Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 470 Hüküm no: 489 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne’de mukim İbrahim b. Mustafa’nın İstanbul’daki arsasını Ramazan Ağa’ya satması Fi’l-asl vilâyet-i Anadolu’da Gedegra kasabası ahâlîsinden olup hâlâ mahrûse-i Edirne kurbünde Sabuncu nâm karyede mütemekkin el-Hâc İbrahim b. Mustafa mahmiye-i İstanbul’da meclis-i şer‘de işbu bâ‘isü’l-kitâb Ramazan Ağa b. Mehmed mahzarında ikrâr ve takrîr-i kelâm edip akd-i âtî’z-zikrin sudûruna değin yedimde mülk ve hakkım olup kasaba-i mezbûrede Şeyh mahâllesinde vâki‘ bir tarafdan el-Hâc Osman ve bir tarafdan Fermanlı Derviş ve Veli Çelebi ve bir tarafdan değirmen arkı ve bir tarafdan tarîk-i âm ile mahdûd tahmînen bir buçuk dönüm yurt yerimi mezbûr Ramazan Ağa’ya kırk guruş ile hîn-i akidde müşârün-ileyhâ ve ba‘de’l-kabz-ı mazîka? bir kabza fülûsa tarafeynden bi’l-îcâb ve’l-kabûl bey‘-i kat‘î ile bey‘ ve temlîk edip ol dahi ber-vech-i muharrer iştirâ ve kabûl eylediğinden sonra semen-i mezbûr kırk guruş ile bir kabza fülûsu yedinden tamâmen ahz u kabz edip arsa-i merkūmeyi mahâllinde kabz ve tasarrufa mezbûr Ramazan Ağa’yı taslît eyledim ba‘de’l-yevm arsa-i merkūmede benim kat‘â alâka ve medhalim kalmadı mezbûr Ramazan Ağa’nın mülk-i müşterâsıdır, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmisi aşer min-Recebi’l-ferd li-sene sitte aşere ve mi’e ve elf. Şuhûdü’l-hâl: Derviş Bey b. Veli, Hınnacı İmamzâde el-Hâc Hüseyin, Öksüz b. Abdullah, Kavuşanlıoğlu, Ali Efendi b. Ahmed, Mehmed Efendi b. Ahmed, İsmail Efendi kâtib.