Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 473 Hüküm no: 492 Orijinal metin no: [120a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin işini halletmek üzere para verdiği Halil Efendi ile olan davasında sulh olduğu Bâ-imzâ-i Hazret efendi. Mahmiye-i İstanbul’da Hocapaşa mahâllesinde sâkin Hasan Ağa b. Abdullah nâm kimesne mahmiye-i mezbûrda meclis-i şer‘de sâbıkā İzmir kādısı olan umdetü’l-mevâli’l-izâm zübdetü’l-fudalâi’l-fihâm işbu sâhibü’l-kitâbü’l-müstetâb Halil Efendi b. el-merhûm Mehmed Efendi b. Ahmed Efendi tarafından husûs-ı âti’l-beyana vekîl olduğu Abdüsselam b. Mustafa ve Feyzullah b. Mustafa nâm kimesneler şehâdetleriyle şer‘an sâbit olan fahrü’l-müderrisîn İbrahim Efendi el-mevâli’l-merhûm Mustafa Efendi mahzarında ikrâr ve takrîr-i kelâm edip bundan akdem müvekkil-i mûmâ-ileyh Halil Efendi zikri mürûr eden İzmir kādısı iken beynimizde ma‘lûm bir husûsun temşiyeti için ben malımdan bi-tarîkı’r-rüşve müvekkil-i mûmâ-ileyh Halil Efendi’ye iki yüz guruş def‘ ü teslîm ol dahi ber-vech-i muharrer ahz u istihlâk etmişidi deyü meblağ-ı mezbûru bi-tarîkı’d-damân müvekkil-i mûmâ-ileyhden taleb ve da‘vâ eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihi beynimize muslihûn tavassut edip da‘vâ-i mezkûremden beni müvekkil-i mûmâ-ileyh Halil Efendi ile seksen guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr seksen guruş müvekkilim mûmâ-ileyh malından vekîl-i merkūm yedinden işbu meclis-i şer‘de tamâmen ahz u kabz edip husûs-ı mezkûre ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i da‘vâ ve kâffe-i mutâlebâtdan müvekkil-i mûmâ-ileyh Halil Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: Eş-şeyh Mehmed Efendi, İsmail Efendi, Ali Ağa b. İbrahim, Abdülbaki Efendi b. Hasan, Ali Beşe b. Süleyman, Abdullah Efendi b. Hasan, Mehmed Çelebi b. Abdülbaki.