Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 473 Hüküm no: 493 Orijinal metin no: [120a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf’un torunları Fatıma ve Emine’ye vasiyet gereği yirmibeşer kuruş verilmesi Mahmiye-i İstanbul’da Tercümanyunus mahâllesi sâkinelerinden olup zâtları ma‘rifet-i şer‘iyye ile ârifân Mustafa b. Abdullah ve Mehmed b. Abdullah nâm kimesneler ta‘rîfleriyle mu‘arrefe olan Fâtıma ve Emine bt. İsmail nâm hatunlar mahmiye-i mezbûrede meclis-i şer‘de merhûm Simkeş el-Hâc Yusuf b. Abdullah’ın atikası Saliha bt. Abdullah nâm hatunun kızı olup mahmiye-i mezbûrda Fethiyye Câmi‘-i şerîfi kurbünde sâkin iken bundan akdem bilâ-vâris-i ma‘rûf fevt olan Fâtıma bt. Mehmed nâm hatunun bi’l-cümle terekesini ahz u kabza ve ber-mûceb-i hüccet-i şer‘iyye vesâyâsını tenfîze vasiyy-i muhtârı olmağla tereke-i müteveffât-ı mezbûreye bi’l-vesâye vâzı‘ü’l-yed olan işbu râfi‘ü’l-vesîka Molla Mustafa b. Mehmed nâm kimesne mahzarından her biri ikrâr ve takrîr-i kelâm edip biz müteveffâ-yı mezbûre Fâtıma’nın vâlidesi merkūme Saliha’nın mu‘takı olan merhûm-ı mezbûr Simkeş el-Hâc Yusuf’un oğlu İsmail’in sulbiye kızları olup bizim için şer‘an hakk-ı velâ‘ olmayıp lâkin müteveffân-ı mezbûre Fâtıma hayâtında ben bi-emrillâhi te‘âlâ vefât eylediğimde bizim için malımdan Fâtıma ve Emine’den her birisine yirmi beşer guruşdan cem‘an elli guruş verile deyü vasiyet edip musırran alâ-îsâihâ vefât etmekle vasiyy-i mezbûr Molla Mustafa müteveffât-ı mezbûrenin vasiyeti üzere meblağ-ı mecmû‘-ı mezbûr elli guruşu tereke-i müteveffât-ı mezbûreden bize def‘ ü teslîm biz dahi ber-vech-i muharrer yedinden ahz u kabz edip müteveffâ-i mezbûrenin terekesine müte‘allıka âmme-i da‘vâ ve kâffe-i mutâlebâttan vasiyy-i merkūm Molla Mustafa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: Mustafa Ağa b. Abdi el-mübâşir, Mehmed emîn Efendi el-kādı, Mehmed b. Abdullah, İslâm Çelebi el-muhzır, el-Hâc Abdurrahman el-muhzır.