Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 474 Hüküm no: 494 Orijinal metin no: [120b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selime bt. Ahmed’in, Süleyman Çelebi’ye olan bakkal malı borcunu ödemesi hususunda ikaz edilmesi Bâ-imzâ-i Hazret efendi. Mahmiye-i İstanbul’da Uzun Şücâ‘ mahâllesinde sâkin işbu râfi‘ü’l-kitâb Süleyman Çelebi b. Hüseyin nâm kimesne mahmiye-i mezbûrede meclis-i şer‘-i hatîr-i lâzımü’t-tevkīrde mahmiye-i mezbûrede Eski odalar kurbünde sâkine Selîme bt. Ahmed b. Abdullah nâm hatun tarafından husûs-ı âti’l-beyana vekîl olduğu zâtları ma‘rifet-i şer‘iyye ile ârifân Ali Bey b. Mehmed ve Mehmed Bey b. Mustafa nâm kimesneler şehâdetleriyle şer‘an sâbite olan Hadîce b. Ali nâm hatun mahzarında üzerine da‘vâ ve takrîr-i kelâm edip yedimde olan işbu bir kıt‘a deyn temessükü nâtık olduğu üzere müvekkile-i mezbûre Selîme Hatun zimmetinde bundan akdem yedimden iştirâ ve kabz eylediği beynimizde ma‘lûm bakkāl metâ‘ı semeninden on sekiz bin iki yüz on akçe hakkım olmağla hâlâ meblağ-ı mezbûru müvekkile-i mezbûreden talep ederim vekîl-i mezbûra suâl olunsun dedikde gıbbe’s-suâl vekîl-i mezbûre Hadîce Hatun cevâbında fi’l-hakīka kazıyye vech-i muharrer üzere olup müdde‘î-i mezbûra ber-mûceb-i temessük müvekkilem mezbûre Selîme Hatun’un mârrü’z-zikr bakkāl metâ‘ı semeninde meblağ-ı mezbûr on sekiz bin iki yüz on akçe zimmetinde vâcibü’l-edâ ve lâzimü’l-kazâ deyni vardır deyü bi-tav‘ihâ ikrâr ve i‘tirâf etmeğin alâ-mûceb-i i‘tirâfihâ meblağ-ı mezbûr on sekiz bin iki yüz on akçeyi müvekkilesi mezbûre Selîme Hatun müdde‘î-i mezbûra edâ ve teslîme vekîl-i mezbûre Hadîce Hatun’a ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: Ahmed Çavuş b. Mehmed, es-Seyyid Süleyman Ağa b. ( ), Ali Çelebi b. Mehmed, Süleyman Ağa b. Ebubekir.