Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 475 Hüküm no: 495 Orijinal metin no: [120b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vekil Mustafa Ağa’nın iltizam bedelini Mehmed Efendi’ye teslim ettiği Bâ-imzâ-i Hazret efendi. Medîne-i Halebü’ş-şehbâ’da vâki‘ Sâhibiye nâm sâhibü’l-hayr evkāfının mütevellîsi olup mahmiye-i İstanbul’da merhûm ve mağfûrun-leh Fatih Sultân Mehmed Han -aleyhi’r-rahmetü ve’l-gufrân- Câmi‘-i şerîfi kurbünde müsâfiren sâkin eş-Şeyh Mehmed Efendi b. Fahreddin nâm kimesne mahmiye-i mezbûrede meclis-i şer‘de hâlâ bâlâ-nişîn-i sadâret-i uzmâ erîke-nikîn-i vekâlet-i kübrâ olan düstûr-i ekrem müşîr-i efham devletlü ve sa‘âdetlü el-Hâc Ahmed Paşa -yesserallâhu mâ-yürîd ve mâ yeşâ- hazretlerinin enderûn ağalarından işbu râfi‘ü’l-kitâb zahru’l-emâsil ve’l-akrân Mustafa Ağa b. Abdurrahman nâm kimesne mahzarında ikrâr ve takrîr-i kelâm edip vakf-ı mezbûr kurâsından olup medîne-i mezbûre havâlîsinde vâki‘ Kefer Silvan nâm karyeyi bin yüz on dört senesinde bedel-i misli olan dört yüz guruşa âhara der-uhde ve iltizâm ve bedel-i mezkûru kabz ve bana îsâl ve teslîme ben bi’t-tevliye tarafımdan merkūm Mustafa Ağa’yı vekîl ve nâib-i menâb nasb u ta‘yîn eylediğimde ol dahi ba‘de’l-kabûl karye-i mezbûreyi sene-i mezkûrede bedel-i mezbûr dört yüz guruşa bi’l-vekâle âhara der-uhde ve iltizâm ve kabz-ı bedel-i mezkûr eyledikden sonra meblağ-ı mezbûrun üç yüz guruşunu bundan akdem merkūm Mustafa Ağa bana def‘ ü teslîm, ben dahi bi’t-tevliye vakf-ı mezbûr için ahz u kabz edip yüz guruş bâkī kalmış idi hâlâ merkūm Mustafa Ağa meblağ-ı bâkī-i mezbûr yüz guruşu dahi bana def‘ ü teslîm ben dahi bu vech üzere bedel-i mezkûr dört yüz guruşu merkūm Mustafa Ağa yedinden tamâmen ahz u kabz eyledim bedel-i mezkûr dört yüz guruşdan merkūm Mustafa Ağa yedinden tamâmen ahz u kabz eyledim, bedel-i mezkûr dört yüz guruşdan merkūm Mustafa Ağa yedinde ve kıbelinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Recebi’l-ferd li-sene sitte aşere ve mi’e ve elf. Şuhûdü’l-hâl: Hasan Çavuş b. Abdi, İsmail Efendi Sandalcızâde, İbrahim Efendi b. Ataullah, Ali Bey b. Abdullah, Süleyman Ağa b. Ebubekir.