Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 476 Hüküm no: 496 Orijinal metin no: [120b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Yoseb’in emanet parayı varislere teslim etmesi Bâ-imzâ-i Hazret efendi. Mahmiye-i İstanbul’da Kâtib Kasım mahâllesinde sâkin iken bundan akdem hâlik olan Lehli Dellâl Arslan v. Çağfer nâm Ermeni’nin verâseti zevce-i metrûkesi Margarit bt. Kirkor nâm Nasrâniye ile sulbî sagīr oğlu Serkiz’e münhasıra olduğu lede’ş-şer‘ zâhir ve müte‘ayyin oldukdan sonra kendi nefsinden asâleten ve sagīr-i mezbûr Serkis’in tesviye-i emrine kıbel-i şer‘den mansûb ve vasiyyesi olup zâtı ma‘rifet-i şer‘iyye ile ârifân Bedros v. Markar ve Odik v. Kelar nâm Ermeniler ta‘rîfleriyle mu‘arrefe olan mezbûre Margarit mahmiye-i mezbûrede meclis-i şer‘de işbu râfi‘ü’s-sifr Karabet v. Yoseb nâm Ermeni muvâcehesinde ikrâr ve takrîr-i kelâm edip mûrisim hâlik-i mezbûr Dellâl Arslan hayâtında malından sekiz yüz elli üç guruşu bi-tarîkı’l-emâne mezbûr Karabet’e def‘ ü teslîm ol dahi ber-vech-i muharrer ba‘de’l-ahz meblağ-ı mezbûru kable’l-kabz mûrisimiz mezbûr Dellâl Arslan hâlik olup meblağ-ı mezbûr ırsen benimle vasıyyesi olduğum sagīr-i mezbûra isâbet ve intikāl eyledikden sonra meblağ-ı mezbûru merkūm Karabet bana teslîm etmeyip kendi masârıfına sarfla istihlâk etmekle bundan akdem mezbûr Karabet [121a] yedinde olan bir kıt‘a hüccet-i şer‘iyye nâtıka olduğu üzere meblağ-ı mezbûrun yüz kırk üç guruşunu ve bir def‘a dahi altı yüz doksan beş guruşunu ki iki def‘ada sekiz yüz otuz sekiz guruşunu bana edâ ve teslîm ben dahi asâleten ve vesâyeten yedinden ahz u kabz edip on beş guruşu bâkī kalmış idi hâlâ mezbûr Karabet meblağ-ı bâkī-i mezkûr on beş guruşu dahi bana def‘ ü teslîm ben dahi bu vech üzere meblağ-ı mezbûr sekiz yüz elli üç guruşu asâleten ve vesâyeten yedinden tamâmen ahz u kabz edip husûs-ı mezbûra ve gayra müte‘allıka âmme-i da‘vâ ve kâffe-i mutâlebâtdan ben asâleten mezbûr Karabet’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim, mezbûr Karabet dahi ber-vech-i muharrer bana medfû‘u olan meblağ-ı mezbûr sekiz yüz elli üç guruşa ve benden iddi‘â eylediği beynimizde ma‘lûm olan menzil icâresine ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka cemî‘ da‘vâdan benim ve sagīr-i mezbûrun zimmetimizi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: Mustafa Efendi b. el-Hâc Ali, İbrahim Efendi b. İbrahim, İbrahim Çavuş b. Hüseyin, İbrahim Çelebi b. Ahmed, Ali Bey b. Abdullah, es-Seyyid Ali Çelebi b. Ubeyd, Süleyman Bey b. Ahmed, Yusuf Çelebi b. Abdullah. Bedros v. Markar, Nişo v. Kragos, Odik v. Kelar, Karabet v. Safer.