Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 477 Hüküm no: 497 Orijinal metin no: [121a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Halil’in Hatice Sultan mahallesindeki menzilini Hüseyin Ağa’ya satması Mahmiye-i İstanbul’da Hadîce Sultân mahâllesinde sâkin Hüseyin Ağa b. Ahmed nâm kimesne mahmiye-i mezbûrede meclis-i şer‘de râfi‘atü hâzihi’l-vesîka Emine bt. Halil nâm hatun tarafından husûs-ı âti’l-beyana vekîl olduğu Ahmed Ağa b. Mehmed ve Hasan b. Hüseyin nâm kimesneler şehâdetleriyle şer‘an sâbit olan zevci İsmail odabaşı b. Şaban nâm kimesne mahzarında ikrâr ve takrîr-i kelâm edip akd-i âti’z-zikri sudûruna değin yedimde mülküm olup mahâlle-i mezbûrda vâki‘ bir tarafdan âhar mülküm ve bir tarafdan ba‘zan Sakaoğlu Mehmed Çelebi ve Ahmed Ağa ve ba‘zan Kâtiboğlu Ahmed Çelebi nâm kimesneler menzilleri ve bir tarafdan Ahmed b. Abdullah nâm kimesne menzili ve bir tarafdan tarîk-i âm ile mahdûd fevkānî iki bâb oda bir bâb oda ve bir sofa ve tahtânî bir bâb oda ve bir harâb matbâh ve bir mikdâr bahçe ve havluyu müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile zevcesi müvekkile-i mezbûre Âmine’ye yüz yetmiş bir guruşa bey‘ ve temlîk ve teslîm ol dahi iştirâ ve temellük ve tesellüm ve kabûl eyledikden sonra semen olan meblağ-ı mezbûru müvekkile-i mezbûre Âmine yedinden tamâmen ahz u kabz eyledim ba‘de’l-yevm menzil-i mahdûd-ı mezbûr müvekkile-i mezbûre Âmine’nin mülk-i müşterâsı olmuşdur, keyfe mâ teşâ ve tahtâr mutasarrıfe olsun dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: Mahmud Odabaşı b. Muharrem, İbrahim b. Abdullah, Abdi Beşe b. İsmail, Ahmed Çelebi b. Abdullah, el-Hâc Mehmed Ağa b. Ali, İsmail b. Mehmed, İsmail b. Ahmed, Yazıcı Ahmed b. Hüseyin.