Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 478 Hüküm no: 499 Orijinal metin no: [121b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kanos v. Todori’nin varislerinden oğlu Yorgaki’nin hissesini terekeden aldığı Mahmiye-i İstanbul’da Kumkapı dâhilinde Tavâşî Süleyman Ağa mahâllesinde sâkin iken bundan akdem hâlik olan Kanos v. Todori nâm zimmînin verâseti zevce-i metrûkesi Satı bt. Manol nâm Nasrâniye ile sulbî kebîr oğulları Todori ve Nikola ve Yorgaki’ye ve sagīr oğlu Yanaki’ye ve sulbiye kebîre kızları Fani ve Elena ve sulbiye sagīre kızı Hrisine münhasıra ve mesele-i mîrâsı seksen sekiz sehmden olup sihâm-ı mezbûrûnun on bir sehmi mezbûre Satı’ya ve on dört sehmi mezbûrûn Todori ve Nikola ve Yorgaki ve Yanaki’den her birine ve yedişer sehmi mezbûrât Fati ve Elena ve Hrisine’den her birine isâbeti tahakkukundan sonra merkūm Yorgaki mahmiye-i mezbûrede meclis-i şer‘de nefsinden asil ve sagīrân-ı mezbûrân Yanaki ve Hrisine üzerlerine zamm-ı vasî olan vâlideleri merkūme Satı ile mezbûrûn Todori ve Nikola ve Elena ve Fatı muvâcehelerinde ikrâr ve takrîr-i kelâm edip babam hâlik-i merkūmun mahâlle-i mezbûrede vâki‘ menzili ile sâir emlâkı ve akārından tarîk-i mezkûr üzere benim on dört sehim hisse-i ırsiye-i şer‘iyyemi nukūd ve menkūlâtdan tamâmen ahz u kabz etmekle babam hâlik-i merkūmun menzil-i mezbûr ile sâir emlâk ve akārâtda vechen mine’l-vücûh aslâ alâka ve medhalim kalmayıp babam hâlik-i merkūmun mecmû‘-ı terekesinden bana isâbet eden on dört sehim hisse-i ırsiyeye müte‘allıka âmme-i da‘vâ ve kâffe-i mutâlebâtdan mezbûrûn Satı ve Todori ve Nikola ve Yanaki ve Fati ve Elena ve Hrisine’den her birinin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Eyüb Çelebi b. Mehmed, Mehmed b. Abdullah, es-Seyyid Ebubekir Çelebi b. Mehmed, Ali Efendi b. Ahmed, Mehmed Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kādı.