Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 478 Hüküm no: 500 Orijinal metin no: [121b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kanos v. Todori’nin varislerinden oğlu Yorgaki’nin diğer hissedarlarla hesabını tamamen gördüğü Mahmiye-i İstanbul’da Kumkapı dâhilinde Tavâşî Süleyman Ağa mahâllesinde sâkin iken bundan akdem hâlik olan Kanos v. Todori nâm zimmînin verâseti zevce-i metrûkesi Satı bt. Manol nâm Nasrâniye ile sulbî kebîr oğulları Todori ve Nikola ve Yorgaki’ye ve sagīr oğlu Yanaki’ye ve kebîre kızları Fati ve Elena’ya ve sagīre kızı Hrisine’ye münhasıra ve sahîh-i meselesi seksen sekiz sehmden olup sihâm-ı mezbûrenin on bir sehmi mezbûre Satı’ya ve on dörder sehmi mezbûrûn Todori ve Nikola ve Yorgaki ve Yanaki’den her birine ve yedişer sehmi mezbûrât Fati ve Elena ve Hrisine’ye isâbet etmekle meblağ-ı âti’l-beyanın bin sekiz yüz akçesi merkūme Satı’ya ve ikişer bin ikişer yüz seksen ikişer akçesi mezbûrûn Todori ve Nikola ve Yorgaki ve Yanaki’den her birine ve bin yüz kırk bir akçesi mezbûrât Fati ve Elena ve Hrisine’ye intikāl eylediği lede’ş-şer‘ zâhir ve mütehakkık oldukdan sonra nefsinden asil ve sagīrân-ı mezbûrân Yanaki ve Hrisine üzerlerine kıbel-i şer‘den zamm-ı vasî nasb u ta‘yîn olunan merkūme Satı ve kezâlik nefsinden asil ve karındaşı merkūme Fati tarafından husûs-ı âti’l-beyana vekîl olduğu zât-ı mezbûreyi mu‘arrefe-i şer‘iyye ile ârifân olan ve Rago v. Dimitri ve Yorgi v. Mihal nâm zimmîler şehâdetleriyle şer‘an sâbit olan merkūm Todori ve mezbûr Nikola mahmiye-i mezbûrede meclis-i şer‘de merkūmûn Todori ve Nikola ve Elena’nın suğrlarında ve sagīrân-ı mezbûrân Yanaki ve Fati’nin hâlâ kıbel-i şer‘de mansûb ve vasîleri olan işbu râfi‘ü’s-sifr merkūm Yorgaki muvâcehesinde her biri bi’l-asâle ve bi’l-vekâle ikrâr-ı tam ve takrîr-i kelâm edip vasiyy-i merkūm Yorgaki diyâr-ı âhara âzim olmağa cümlemiz ma‘rifetiyle muhâsebesi görüldükde ve mûrisimiz hâlik-i merkūmun terekesinden zimmetinde yüz yirmi guruş zuhûr etmişidi el-hâletü hâzihi vasiyy-i merkūm Yorgaki meblağ-ı mezbûr yüz yirmi guruşdan tashîh-i mezkûr üzere bizim altmış sehim hisse-i ırsiyemize isâbet eden cem‘an dokuz bin yedi yüz seksen yedi akçeyi tamâmen bize def‘ ü teslîm biz dahi yedinden ahz u kabz edip mûrisimiz hâlik-i merkūm Kanos’un terekesinden bize [122a] âide hisse-i ırsiye-i şer‘iyyemize müte‘allıka âmme-i da‘vâ ve kâffe-i mutâlebâtdan merkūm Yorgaki’nin zimmetini her birimiz bi’l-asâle ve bi’l-vekâle ibrâ ve iskāt eyledik min-ba‘d hâlik-i merkūmun terekesinden bize isâbet eden hisse-i ırsiyemize müte‘allıka merkūm Yorgaki ile vechen mine’l-vücûh ve sebeben mine’l-esbâb aslâ da‘vâ ve nizâ‘ımız yokdur dediklerinde gıbbe’t-tasdîkı’l-mu‘teber merkūme Satı meclis-i mezkûrde vasiyy-i mezbûr Yorgaki muvâcehesinde i‘âde-i kelâm edip ben dahi sagīrân-ı mezbûrân Yanaki ve Hrisine üzerlerinde ber-vech-i muharrer kıbel-i şer‘den zamm-ı vasî nasb u ta‘yîn olunmağın merkūm Yorgaki meblağ-ı mezbûrdan sagīrân-ı mezbûrânın yirmi bir sehim hisse-i ırsiyelerine isâbet eden üç bin dört yüz yirmi üç akçeyi dahi bana def‘ ü teslîm ben dahi yedinden ahz u kabz eyledim min-ba‘d sagīrân-ı mezbûrânın hisse-i ırsiyelerinden vasîleri merkūm Yorgaki yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşere min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Eyüb Çelebi b. Mehmed, Mehmed b. Abdullah, es-Seyyid Ebubekir b. Mehmed, Ali Efendi b. Mehmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı.