Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 480 Hüküm no: 501 Orijinal metin no: [122a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manisa Valisi Ahmed Paşa, kethüdası Ali Ağa’ya borcunu ödemesi hususunda yapılan tenbih Mahmiye-i İstanbul’da Kadırga Limanı kurbünde sâkin işbu bâ‘isü’l-kitâb Hammâmî Yusuf Ağa b. Mehmed mahmiye-i İstanbul’da meclis-i şer‘-i hatîr-i lâzimü’t-tevkīrde sâbıkā Manisa vâlisi Ahmed Paşa’nın kethüdâsı Ali Ağa b. Cafer mahzarında üzerine da‘vâ ve takrîr-i kelâm edip işbu mezbûr Ali Ağa zimmetinde yedimde olan bir kıt‘a deyn temessükü mûcibince cihet-i karz-ı şer‘îden üç yüz on beş guruş hakkım olup meblağ-ı merkūmun kırk guruşunu bundan akdem mezbûr Ali Ağa yedinden ahz u istîfâ edip iki yüz yetmiş beş guruş zimmetinde bâkī kalmağla hâlâ meblağ-ı bâkī-i mezbûru merkūm Ali Ağa’dan taleb eylediğimde edâdan imtinâ‘ eder suâl olunup alıverilmek matlûbumdur dedikde gıbbe’s-suâl mezbûr Ali Ağa cevâbında fi’l-vâki‘ müdde‘î-i mezbûr Yusuf Ağa’ya cihet-i merkūmeden zimmetinde bâkī iki yüz yetmiş beş guruş deyni olduğunu ikrâr ve i‘tirâf etmeğin mûcibince meblağ-ı bâkī-i mezbûr iki yüz yetmiş beş guruşu müdde‘î-i mezbûra [edâ] ve teslîme mezbûr Ali Ağa’ya tenbîh olunup mâ-vaka‘a bi’t-taleb ketb olundu. Fi’l-yevmi’s-sâbi‘ aşere min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Süleyman Çavuş el-mübâşir, Hasan Çelebi b. Mustafa, Ali Efendi b. Ahmed, el-Hâc Mehmed Efendi b. Ahmed, Veli Efendi el-kādı, el-Hâc Yusuf b. Osman.