Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 480 Hüküm no: 502 Orijinal metin no: [122a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın Saraylı Kızı diye meşhur kadının menzilini müştemilatıyla birlikte satın aldığı Mahmiye-i İstanbul’da Karabaş mahâllesi imamı olan es-Seyyid Mehmed Efendi b. es-Seyyid eş-Şeyh Hasan Efendi mahmiye-i mezbûrede meclis-i şer‘de mahâlle-i mezbûrda vâki‘ bir tarafdan Balcı el-Hâc Mehmed mülkü ve bir tarafdan müezzin Mehmed Çelebi tasarrufunda olan menzil ve bir tarafdan muhzır el-Hâc Mustafa veresesi yedlerinde olan menzil ve bir tarafdan tarîk-ı âm ile mahdûd üç bâb fevkānî ve iki bâb tahtânî oda ve bir su kuyusu ve bahçe ve bir mikdâr havluyu müştemil menzile mülkiyet üzere vâzı‘ü’l-yed olan işbu râfi‘ü’l-vesîka Mehmed Ağa b. Abdullah mahzarında ikrâr ve takrîr-i kelâm edip mezbûr Mehmed Ağa menzil-i mahdûd-ı merkūmu Saraylı kızı demekle ma‘rûfe hatundan semen-i ma‘lûma iştirâ ve kabz etmekle hâlâ mülk-i müşterâsı olup mezbûr Mehmed Ağa ile benim menzil-i mahdûd-ı mezbûra müte‘allıka vechen mine’l-vücûh ve sebeben mine’l-esbâb aslâ da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşere min- Recebi’l-mürecceb li-sene sitte aşere ve mi’e ve elf. Şuhûdü’l-hâl: Derviş Bey b. Veli, Mehmed Efendi b. Mustafa, el-Hâc Mehmed b. Ali, Hasan Bey b. Bayram, Mehmed Efendi müezzin-i mahâlle-i mezbûr, Mustafa Efendi b. el-Müezzin Mehmed Efendi.