Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 483 Hüküm no: 504 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa’nın Van Valisi Ömer Paşa’nın vekilharcı olan Ahmed Ağa’dan alacağıyla ilgili davada sulh olduğu Mahmiye-i İstanbul’da el-Hâc İsâ mahâllesi ahâlîsinden Abdullah Ağa b. Muslı mahâlle-i mezbûrede meclis-i şer‘de sâbıkā Van vâlisi olan Ömer Paşa’nın vekîl-i harcı olan işbu râfi‘ü’l-vesîka Ahmed Ağa b. Hasan mahzarında üzerine da‘vâ ve takrîr-i kelâm edip işbu mezbûr Ahmed Ağa medîne-i Van’da Paşa-i müşârün-ileyhin vekîl-i harcı olduğu hâlde bi-gayrı hakkın yüz guruşum ile on guruş kıymetli bir kuşak ve altı guruş kıymetli bir bogasimi ahz u kabz etmekle hâlâ meblağ-ı mezbûr ile zikr olunan bogasi ve kuşak mevcûd ise aynlarını, müstehlek ise kıymet-i şer‘iyyelerini mezbûr Ahmed Ağa’dan taleb eylediğimde edâdan imtinâ‘ eder suâl olunup alıverilmek matlûbumdur dedikde gıbbe’s-suâl mezbûr Ahmed Ağa cevâbında fi’l-vâki‘ müdde‘î-i mezbûr Abdullah Ağa yedinden ber-vech-i muharrer yüz guruş ile bir kuşak ve bir bogasi ahz u kabz eylediğini ikrâr lâkin müdde‘î-i mezbûr Abdullah Ağa’nın Paşa-i müşârün-ileyhe ma‘lûmü’l-mikdâr deyni olmağla meblağ-ı mezbûr yüz guruşu bana Paşa-i müşârün-ileyhin emriyle deyn-i mezbûra mahsûben vermiş idi deyü def‘ ile mukābele etmeğin gıbbe’l-istintâk ve’l-inkâr mezbûr Ahmed Ağa’dan def‘-i mezkûruna beyyine taleb olundukda Paşa-i müşârün-ileyhin ol vakitde kapıcılar kethüdâsı olan Ali Ağa bin İbrahim ve müezzini olan İsmail Çelebi b. Mehmed li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müşârün-ileyh Ömer Paşa’nın işbu müdde‘î-i mezbûr Abdullah Ağa zimmetinde ma‘lûmü’l-mikdâr hakkı olmağla mezbûr Abdullah Ağa meblağ-ı mezbûr yüz guruşu mezbûr Ahmed Ağa’ya Paşa-i müşârün-ileyhin emriyle deyn-i mezbûra mahsûben vermiş idi bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcibince mezbûr Abdullah Ağa meblağ-ı mezbûr yüz guruş mutâlebesiyle bî-vech mu‘ârazadan men‘ olundukdan sonra mezbûr Abdullah Ağa meclis-i mezkûrede mezbûr Ahmed Ağa mahzarında ikrâr ve takrîr-i kelâm edip işbu mezbûr Ahmed Ağa iddi‘â eylediğim sâlifü’z-zikr bir kuşak ve bir bogasi da‘vâsından beni vesâtet-i muslihîn ile altı guruş ve bir zolata üzerine [123b] sulh eylediklerinde ben dahi sulh-ı mezbûru kabûl ve bedel-i mezbûr altı guruş ve bir zolatayı yedinden ahz u kabz edip husûs-ı mezbûra müte‘allıka da‘vâdan mezbûr Ahmed Ağa’nın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı, Veli Efendi el-kādı, Mehmed Efendi el-kādı, Mehmed Çavuş b. Abdullah.