Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 484 Hüküm no: 505 Orijinal metin no: [123b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tırhala’nın Baklalı ve Porta nahiyelerinin ihtisâb ve ihzariye vergilerini iltizama alanlar arasındaki anlaşmazlığın Kapıcıoğlu Süleyman lehine sonuçlandığı Kapıcıoğullarından olup vilâyet-i Rumeli’nde Tırhala kazâsı nevâhîsinden Baklalı ve Porta nâhiyesinin ihtisâb [ve] ihzâriyesine berat-ı âlişân ile mutasarrıf olan bâ‘isü’l-kitâb Süleyman b. Hüseyin nâm kimesne mahmiye-i İstanbul’da meclis-i şer‘-i hâtîrde Ali b. Hüseyin ve Turhan b. Ahmed nâm kimesneler mahzarlarında üzerlerine da‘vâ ve takrîr-i kelâm edip berat-ı âlişân ile mutasarrıf olduğum mârrü’z-zikr nâhiyelerin ihtisâb ve ihzâriyesini bin yüz on beş senesi Recebi gurresinden bir sene tamâmına değin zabt etmek üzere İbrahim b. Mehmed vesâtetiyle otuz yedi guruşa der-uhde ve iltizâm onlar dahi ber-vech-i iştirâk iltizâm ve kabûl edip bedel-i iltizâmından ancak yirmi yedi guruşunu bana def‘ ü teslîm ben dahi ahz u kabz eylediğimden sonra mezbûrân zikr olunan ihtisâb ve ihzâriyeyi zabt ve mahsûlât-ı rüsûmâtından ol mikdâr akçe ahz u kabz etmişler iken sâlifü’l-beyan ihtisâb ve ihzâriye sene-i mezbûre Recebi evâsıtından âhara tevcîh olunup bize zabtı müyesser olmadı deyü bana medfû‘ları olan meblağ-ı merkūmu hâkim-i muvakkı‘-ı sadr-ı kitâb huzûrunda benden da‘vâ ben dahi ol târîhde mezbûrânın mârrü’z-zikr ihtisâb ve ihzâriyeyi zabt ve mahsûlâtını kabz eylediklerini isbâtdan âciz ve mezbûrân tahlîf olunup meblağ-ı merkūm yirmi yedi guruşu hükm-i hâkim-i mûmâ-ileyh ile mezbûrâna def‘ ü teslîm etmişidim hâlâ ben husûs-ı mezbûru isbâta kādir olmağla meblağ-ı merkūmu yine mezbûrândan taleb eylerim suâl olunsun dedikde gıbbe’s-suâl mezbûrân cevâblarında fi’l-hakīka kazıyye vech-i meşrûh üzere olup meblağ-ı merkūm yirmi guruşu müdde‘î-i mezbûrûn kabzlarını ikrâr lâkin sâlifü’l-beyan ihtisâb ve ihzâriyeyi zabt ve mahsulâtını kabzlarını inkâr etmeleriyle müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden ve sene-i mezbûrda kazâ-i mezbûrda duhân dönümcüsü olup hâlâ mahmiye-i mezbûrede Davudpaşa Câmi‘i kurbünde sâkin İbrahim Bey b. Mustafa ve Balcıyokuşu mahâllesinde sâkin Ebubekir b. Mustafa nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka bin yüz on beş senesi Recebi’nden Tırhala kazâsı nevâhîsinden Baklalı ve Porta nâhiyelerinin ihtisâb ve ihzâriyesini işbu mezbûrân Ali ve Turhan müdde‘î-i mezbûr Süleyman tarafından zabt ve mahsûlât ve rüsûmâtından Baklalı mezra‘ası mahsûlünden otuz iki guruşu bizim huzûrumuzda ahz u kabz eylediler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince meblağ-ı merkūm yirmi yedi guruşu müdde‘î-i mezbûra red ve teslîme mezbûrân Ali ve Turhan’a tenbîh olunup mâ-vaka‘a bi’t-taleb ketb olundu. Fi’l-yevmi’s-sâbi‘ aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, Ali Efendi b. Ahmed, Ömer Efendi b. Ali, el-Hâc Yusuf b. Osman.