Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 485 Hüküm no: 506 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Efendi medresesinde vefat eden Kastamonulu Halil Efendi’nin terekesinin kardeşi Mehmed Bey’e teslimi Fi’l-asl Vilâyet-i Anadolu’da Kastamonu sancağında Boyalı kazâsına tâbi‘ Memecik nâm karyeden olup hâlâ mahmiye-i İstanbul’da misâfiren sâkin ve ber-vech-i âtî verâset ve vekâlet iddi‘â eden işbu bâ‘isü’l-vesîka Mehmed Bey b. Receb b. Hızır nâm kimesne mahmiye-i mezbûrede meclis-i şer‘-i hatîrde zikri âtî müteveffânın vasiyy-i muhtârı olmağla terekesine vâzı‘ü’l-yed olan Mustafa Efendi b. Ebubekir mahzarında üzerine da‘vâ ve takrîr-i kelâm edip mârrü’z-zikr Memecik karyesi ahâlîsinden olup mahmiye-i mezbûrede Yahya Efendi medresesinde misâfiren sâkin iken bundan akdem vefât eden Halil Efendi b. Receb b. Hızır ile li-ebeveyn karındaşlar olup hattâ müteveffâ-yı mezbûr ile benim babamız ismi mezbûr Receb ve ceddimiz ismi merkūm Hızır ve vâlidemiz ismi Fâtıma ve maskat-ı re’simiz mârrü’z-zikr Memecik karyesidir, müteveffâ-yı mezbûrun verâseti usûbet-i nesebiye cihetinden bana ve karye-i mezbûrda sâkine zevce-i menkûha-i metrûkesi Hadîce bt. Bayram b. Abdurrahman ile sulbiye sagīre kızı Âişe’ye ve vâlidesi Fâtıma bt. İlyas b. Abdullah’a münhasıra olup bizden gayri vârisi ve terekesine müstahakk-ı âhar olmayıp ve ben sagīre-i mezbûrenin tesviye-i emrine kıbel-i şer‘den vasî nasb u ta‘yîn olunup ve mezbûretân Hadîce ve Fâtıma dahi mûrisleri müteveffâ-yı mezbûrun terekesinden kendülere isâbet eden hisse-i ırsiyelerini vasiyy-i mezbûrdan vesâir vâzı‘ü’l-yed olanlardan taleb ve da‘vâ ve ahz u kabza ve kendülere îsâle ve bunlara mütevakkıf olduğu umûrun küllîsine taraflarından her biri vekîl ve nâib-i menâb nasb u ta‘yîn edip ben dahi vekâlet-i merkūmeyi kabûl etmekle hâlâ müteveffâ-yı mezbûrun terekesinden ber-mûceb-i defter-i kassâm mezbûr Mustafa Efendi yedinde mazbûta olan eşyâyı asâlet ve vesâyet ve vekâletim hasebiyle taleb eylediğimde bana teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Mustafa Efendi cevâbında fi’l-vâki‘ tereke-i müteveffâ-yı mezbûra ber-vech-i muharrer vâzı‘ü’l-yedini ikrâr ve lâkin müdde‘î-i mezbûrun minvâl-i muharrer üzere verâseti ve vekâleti ma‘lûmum değildir deyü inkâr etmeğin müdde‘î-i mezbûrdan müdde‘âsını mübeyyine beyyine talep olundukda udûl-i Müslimînden ve mârrü’l-beyan Memecik karyesi ahâlîsinden olup mahmiye-i mezbûrede misâfiren sâkin Halil Efendi b. Mehmed ve Molla Ahmed b. Mehmed nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ mesbûku’z-zikr Memecik karyesi ahâlîsinden olup mahmiye-i mezbûrede Yahya Efendi Medresesi’nde misâfiren sâkin iken bundan akdem vefât eden Halil Efendi b. Receb b. Hızır ile işbu müdde‘î-i mezbûr Mehmed Bey li-ebeveyn karındaşlar olup hattâ müteveffâ-yı mezbûr ile müdde‘î-i merkūmun babaları ismi Receb ve cedleri ismi Hızır ve vâlideleri ismi Fâtıma ve maskat-ı re‘sleri sâlifü’z-zikr Memecik karyesi olup müteveffâ-yı mezbûrun verâseti usûbet-i nesebiye cihetinden müdde‘î-i mezbûr ile karye-i mezbûrda sâkine zevcesi Hadîce bt. Bayram b. Abdurrahman’a ve sagīre kızı Âişe’ye ve vâiledesi Fâtıma bt. İlyas b. Abdullah’a münhasıradır, bunlardan gayri vârisi ve terekesine müstahakk-ı âhar olduğu ma‘lûmumuz değildir ve mezbûretân Hadîce ve Fâtıma mûrisleri müteveffâ-yı mezbûrun terekesinden kendülere isâbet eden hisse-i ırsiyelerini vasiyy-i mezbûrdan ve sâir vâzı‘ü’l-yed olanlardan taleb ü da‘vâ ve ahz u kabza ve kendülere îsâle ve bunlar mütevakkıf olduğu umûrun küllîsine taraflarından işbu müdde‘î-i mezbûr Mehmed Bey’i vekîl ve nâib-i menâb nasb u ta‘yîn edip ol dahi vekâlet-i merkūmeyi kabûl ve merâsimini edâya ta‘ahhüd eyledi ve hâlâ müdde‘î-i mezbûr Mehmed Bey müteveffâ-yı mezbûrun li-ebeveyn karındaşı ve mezbûretân Hadîce ve Fâtıma’nın vekîlleri ve sagīre-i mezbûrenin vasiyy-i mansûbudur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mezbûr Mehmed Bey meclis-i şer‘de i‘âde-i kelâm edip ânifen teslîmine tenbîh olunan müteveffâ-yı mezbûrun ber-mûceb-i defter-i kassâm terekesini mezbûr Mustafa Efendi bana teslîm ben dahi asâlet ve vesâyet ve vekâletim hasebiyle tamâmen ahz u kabz edip müteveffâ-yı mezbûrun terekesinden mezbûr Mustafa Efendi zimmetinde bir şey bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’’t-tâsi‘ aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: es-Seyyid Ali Efendi b. es-Seyyid Receb, İbrahim Efendi b. Hasan, Mustafa Efendi b. Kâmil, Mehmed b. Ramazan, Osman b. Abdullah, Abdülcelil b. Müstakīm, el-Hâc Yusuf b. Abdullah, el-Hâc Ali b. Abdullah.