Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 487 Hüküm no: 507 Orijinal metin no: [124a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurum Cizyedarı Ali Bey’in Ahıska ahalisinden İbrahim’e teslim etmiş olduğu hazine malına karşılık olarak aldığı meblağ ve bir kölesini iade davasında sulh olduğu Vilâyet-i Anadolu’da Trabzon sancağında Ahıska kasabası ahâlîsinden olup mahmiye-i İstanbul’da Ayasofya-i kebîr kurbünde müsâfiren sâkin İbrahim b. Ali nâm kimesne mahmiye-i mezbûrede meclis-i şer‘de medîne-i Erzurum ahâlîsinden olup mahmiye-i mezbûrede Ayazma kurbünda müsâfiren sâkin râfi‘ü’l-vesîka Ali Bey b. Osman nâm kimesne tarafından husûs-ı âti’l-beyana vekîl olduğu Ömer b. Süleyman ve Mehmed Ağa b. Mustafa nâm kimesneler şehâdetleriyle şer‘an sâbit olan Abdurrahman Ağa b. Veli nâm kimesne mahzarında ikrâr ve takrîr-i kelâm edip müvekkil-i mezbûr Ali Bey bin yüz on beş senesinde Erzurum kefere cizyedârı olmağla mârrü’z-zikr Ahıska kalesi Yeniçeriyân neferâtının bin yüz on dört senesinde müstahak oldukları [124b] dört kıt‘a mevâcibleri olan altı bin iki yüz elli guruşu müvekkil-i mezbûr yedine veriğim üç kıt‘a sebeb-i tahrîr-i hükm ile müvekkil-i mezbûr Ali Bey’in sene-i mezbûrda uhdesinde olan mâl-ı cizyeden bâ-fermân-ı âlî ta‘yîn ve havâle ve meblağ-ı mezbûru ben kabzına memûr olduğuma binâen târîh-i mezkûrde müvekkil-i mezbûr Ali Bey meblağ-ı mezbûru bana teslîm esnâsında bi-tarîkı’r-rüşve ve cebren kendi mâlımdan nakid bin beş yüz guruş ile yüz elli guruş kıymetli cins ve evsâfı beynimizde ma‘lûm bir re‘s gulâmımı ahz u kabz ve istihlâk etmişidi deyü meblağ-ı mezbûr ile gulâm-ı mezbûrûn kıymeti olan yüz elli guruş ki cem‘an bin altı yüz elli guruş müvekkil-i mezbûrdan taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde cereyân etmişidi, el-hâletü hâzihi beynimize muslihûn tavassut edip da‘vâ-i mezkûrumdan beni müvekkil-i mezbûr Ali Bey ile iki yüz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûrun altmış guruşunu nakden ahz u kabz edip bâkī yüz kırk guruş ile bundan akdem müvekkil-i mezbûrun dâini olan gāib ani’l-meclis Osman Bey üzerine üçümüz bir meclisde hâzır olduğumuz hâlde havâle-i sahîha-i şer‘iyye ile havâle ve her birimiz dahi havâle-i mezkûreyi kabûl eyleyip bu vech üzere bedel-i sulh-ı mezkûru tamâmen ahz u istîfâ edip husûs-ı mezbûra ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allıka da‘vâ ve kâffe-i mutâlebâtdan müvekkil-i mezbûr Ali Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: İsmail Efendi Sandalcızâde, Ömer Çelebi b. Süleyman, Yusuf Çelebi b. Hasan, Ali Çelebi b. Mehmed.