Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 488 Hüküm no: 508 Orijinal metin no: [124b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. İbrahim’in terekesiyle ilgili davada anlaşma sağlandığı Mahmiye-i İstanbul’da Lâleliçeşme kurbünde Mesihpaşa mahâllesinde sâkin iken bundan akdem vefât eden Mehmed b. el-Hâc İbrahim b. Mehmed’in verâseti babası mezbûr el-Hâc İbrahim ile vâlidesi Ümmühani bt. Abdullah nâm hatuna münhasıra olduğu şer‘an zâhir ve müte‘ayyen oldukdan sonra zâtı ta‘rîfü’ş-şer‘î ile mu‘arrefe olan mezbûre Ümmühani Hatun mahmiye-i mezbûrede meclis-i şer‘-i hatîrde babası mezbûr el-Hâc İbrahim mahzarında ikrâr ve takrîr-i kelâm edip oğlum müteveffâ-yı mezbûrun terekesinden olup babası el-Hâc İbrahimin makbûzu olan altmış guruşdan sülüs hissesine isâbet eden yirmi guruş bundan akdem mezbûr el-Hâc İbrahim’den taleb ve da‘vâ eylediğimde ol dahi cevâbında benim oğlum müteveffâ-yı mezbûr zimmetinde cihet-i karzdan beş yüz elli guruş hakkım vardır deyip bu vech üzere beynimizde münâza‘ât-ı kesîre vâkı‘a olmuş idi el-hâletü hâzihi mezbûr el-Hâc İbrahim mezbûr altmış guruşdan benim hisseme isâbet eden yirmi guruşu tamâmen def‘ ü teslîm ben dahi yedinden ahz u kabz edip oğlum müteveffâ-yı mezbûrun terekesine ve zimmetine cihet-i karzdan hakkım olan elli guruşa müte‘allıka âmme-i da‘vâdan ben mezbûr el-Hâc İbrahim’in zimmetini ibrâ ve iskāt edip ol dahi müdde‘âsı olan beş yüz elli guruşa müte‘allıka âmme-i da‘vâdan benim zimmetimi ibrâ ve iskāt eyledi, fîmâ-ba‘d biribirimiz ile bâlâda zikr olunan husûslara müte‘allıka aslâ da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: es-Seyyid Mehmed b. Mustafa, es-Seyyid Mustafa b. Mehmed, Hasan Çelebi b. Muharrem, Abdurrahman b. Mehmed, Ahmed b. Abdullah solâkī, es-Seyyid Abdullah b. Mustafa, el-Hâc ( ) b. el-Hâc Ali, Mehmed Çelebi b. Mehmed, Abdullah b. Mehmed.