Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 489 Hüküm no: 509 Orijinal metin no: [125a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî kapıcıbaşılarından Ali Ağa’ya borç para veren Süleyman Ağa’nın parasının tamâmını alamadığına dair iddiasının geçersiz olduğu Mahmiye-i İstanbul’da Nöbethâne kurbünde sâkin es-Seyyid Süleyman Ağa b. el-Hâc Musa nâm kimesne mahmiye-i mezbûrede meclis-i şer‘de Dergâh-ı âlî kapucubaşılarından umdetü’l-eşbâh işbu râfi‘ü’l-kitâb Ali Ağa b. Süleyman nâm kimesne mahzarında üzerine da‘vâ ve takrîr-i kelâm edip mezbûr Ali Ağa’ya yüz yirmi guruş ikrâz ve teslîm ol dahi ba‘de’l-iktirâz ve’l-kabz meblağ-ı mezbûru nâtık mümzâ ve mahtûm işbu bir kıt‘a deyn temessükünü dahi verdikden sonra meblağ-ı mezbûrun kırk iki guruş ve bir rub‘ guruşunu mukaddemâ mezbûr Ali Ağa bana edâ ve teslîm ben dahi yedinden ahz u kabz edip yetmiş yedi guruş üç rub‘ guruş bâkī kalmağla hâlâ meblağ-ı bâkī-i mezbûru merkūm Mustafa [Ali] Ağa’dan taleb ederim suâl olunsun dedikde gıbbe’s-suâl mezbûr Ali Ağa cevâbında müdde‘î-i mezbûr es-Seyyid Süleyman Ağa’ya meblağ[-ı mezbûr] yüz yirmi guruşu nâtık mârrü’z-zikr deyn temessükü vermiş idim. Lâkin benim gāib ani’l-meclis es-Seyyid Mehmed Çelebi nâm kimesne ile beynimizde bir mikdâr hesâbımız olup ve müdde‘î-i mezbûr mübâşirimiz olmağla müdde‘î-i mezbûr benim için bana yüz yirmi guruş vermezsen beynimizde olan hesâbınızı gördürmem, yüz yirmi guruş deynimdir deyü ikrâr ve bana temessük ver deyü beni ta‘cîz ve tazyîk etmekle mezbûr es-Seyyid Süleyman Ağa bana yüz yirmi guruş alâ-tarîkı’l-muvâza‘a deyn temessükü tahrîr ve yedine teslîm ba‘dehû meclis-i mezkûrda meblağ-ı mezbûru müdde‘î-i mezbûr yedimden tamâmen ahz u kabz edip bu vech üzere işbu deyn temessükünü muvâza‘a-i müdde‘î-i mezbûra vermiş idim def‘le mukābele ve müdde‘î-i mezbûrun benden tekrâr bi-gayrı hakkın makbûzu olan meblağ-ı mezbûru istirdâd ederim deyicek isre’l-istintâk ve’l-inkâr mezbûr Ali Ağa’dan takrîr-i meşrûhuna mutâbıka beyyine taleb olundukda udûl-i ahrâr-ı ricâl-i Müslimînden ve mahmiye-i mezbûrda Mahmudpaşa kurbünde sâkin Mahmud Bey b. Ahmed ve Servi mahâllesinde sâkin Yusuf Bey b. Abdullah nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ bundan akdem işbu müdde‘î-i mezbûr es-Seyyid Süleyman Ağa mezbûr Ali Ağa’nın gāib-i mezbûr ile beynlerinde olan hesâblarına ber-vech-i muharrer mübâşir olmağla müdde‘î-i mezbûr merkūm Ali Ağa’ya bana yüz yirmi guruş vermezsen hesâbınızı gördürmem yüz yirmi guruş karzen deynimdir deyü ikrâr ve bana temessük ver deyü mezbûr Ali Ağa’yı ta‘cîz ve tazyîk etmekle yüz yirmi guruşu alâ-tarîkı’l-muvâza‘a mezbûr Ali Ağa’ya bizim huzûrumuzda def‘ ü teslîm ve temessük-i mezbûru muvâza‘âten tahrîr ba‘dehû ber-vech-i muharrer medfû‘u olan meblağ-ı mezbûr yüz yirmi guruş ile temessük-i mezbûru müdde‘î-i mezbûr es-Seyyid Süleyman Ağa merkūm Ali Ağa’dan yine bizim huzûrumuzda ahz u kabz eyledi mezbûr Ali Ağa’nın vech-i meşrûh üzere ikrârı ve temessük-i mezbûru tahrîri muvâza‘a tarîki iledir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm ve’t-tenbîh mezbûr Ali Ağa meclis-i mezbûrda mezbûr es-Seyyid Süleyman Ağa mahzarında ikrâr ve takrîr-i kelâm edip ânifen bana teslîme tenbîh olunan meblağ-ı mezbûr kırk iki guruş ve bir rub’ guruşa merkūm es-Seyyid Süleyman Ağa’dan taleb ve da‘vâ sadedinde olmuş idim el-hâletü hâzihi da‘vâ-i mezkûrumdan fâriğ olup husûs-ı mezkûre müte‘allıka cemî‘ da‘vâdan mezbûr es-Seyyid Süleyman Ağa’nın zimmetini ibrâ <>-i âm kātı‘ü’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşere min-Recebi’l-ferd li-sene sitte aşere ve mi’e ve elf. Şuhûdü’l-hâl: İsmail Efendi Sandalcızâde, Ali b. Abdullah, Süleyman Ağa b. Ebubekir, Mehmed b. Abdullah.