Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 490 Hüküm no: 510 Orijinal metin no: [125b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahiler Ağası İbrahim Ağa’nın sarraf taifesinden Ariton ile aralarında vuku bulan borç meselesinden dolayı sulh oldukları Bâ-imzâ-i Hazret-i veliyyü’n-ni‘am. Mahmiye-i İstanbul’da Sofular mahâllesinde sâkin ve hâlâ bi’l-fi‘il sipâhîler ağası olan umdetü’l-emâcid ve’l-ekârim İbrahim Ağa b. Mustafa b. Mehmed tarafından husûs-ı âti’l-beyana vekîl olup Agâh Mustafa Ağa b. Abdullah ve Ebubekir Ağa b. el-Hâc Hüseyin nâm kimesneler şehâdetleriyle hasm-ı câhid-i câ’i’z-zikr muvâcehesinde şer‘an vekâleti sâbite olan Ali Ağa b. Mustafa nâm kimesne mahmiye-i mezbûrede meclis-i şer‘de sarrâf tâifesinden işbu râfi‘ü’s-sifr Ariton v. Tökel v. Serkis nâm Ermeni muvâcehesinde ikrâr ve takrîr-i kelâm edip müvekkilim mûmâ-ileyh İbrahim Ağa’nın yedinde olan bir kıt‘a hüccet-i şer‘iyye nâtık olduğu üzere mezbûr Ariton zimmetinde cihet-i deyn-i şer‘îden on bin yedi yüz yetmiş iki guruş hakkı olmağla müvekkilim mûmâ-ileyh İbrahim Ağa meblağ-ı mezbûru mesfûr Ariton’dan taleb ve da‘vâ eylediğinde beynlerinde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihi beynlerine muslihûn tavassut edip müekkilim mûmâ-ileyh İbrahim Ağa’yı da‘vâ-i mezkûresinden hasmı merkūm Ariton ile altı bin guruş üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûr altı bin guruşu müvekkilim mûmâ-ileyh İbrahim Ağa merkūm Ariton yedinden tamâmen ahz u kabz edip husûs-ı mezkûra ve târîh-i kitâba gelince sâir beynlerinde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan müvekkilim merkūm İbrahim Ağa mezbûr Ariton’un zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi mesfûr Ariton dahi bedel-i sulh deyü müvekkilim mezbûra medfû‘u olan meblağ-ı mezbûr altı bin guruşa ve kezâlik târîh-i kitâba gelince beynlerinde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan müvekkilim mûmâ-ileyh İbrahim Ağa’nın zimmetini ibrâ ve iskāt eyledi ba‘de’l-yevm birbirleriyle vechen mine’l-vücûh ve sebeben mine’l-esbâb kat‘â da‘vâ ve nizâ‘ları kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Recebi’l-ferd sene 1116. Şuhûdü’l-hâl: Hasan Ağa b. ( ), Ali Çavuş b. Hacı Mustafa, Hacı Mustafa b. Halil, Abdullah Çelebi b. Mehmed, Ali Ağa b. ( ), Zahru’l-akrân Telhîsî Abdullah Ağa, el-Hâc Mehmed b. el-Hâc Mustafa, es-Seyyid Mahmud Çelebi b. Nuh, Mehmed Efendi b. Zülfikār, İbrahim b. Mahmud.