Bab Mahkemesi 54 Numaralı Sicil (H. 1102 / M. 1691) cilt: 20, sayfa: 380 Hüküm no: 463 Orijinal metin no: [81a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin es-Seyyid Abdülkerim Efendi’den saman satışından hasıl alacak iddiasının reddi Mahrûse-i Edirne’de Timurtaş mahallesinde sâkin olup mahmiye-i İstanbul’da müsâferet vechi üzre sâkin olan Mehmed b. Ali meclis-i şer‘-i şerîf-i enverde, el-Hâc İbrahim b. Abdullah mahzarında üzerine da‘vâ ve takrîr-i kelâm edip, gāib ani’l-meclis es-Seyyid Abdülkerim Efendi bin doksan yedi senesinde bana dört yüz elli kantar saman iştirâ ediver deyu emr etmekle, ben dahi emr-i mezkûruna binâ’en kendi mâlımla her kantarı seksener akçeye olmak üzre dört yüz elli kantar saman iştirâ ve kabz eylediğimde, gāib-i mezbûr es-Seyyid Abdülkerim Efendi’nin ol târihde hizmetkârı olan mezbûr el-Hâc İbrahim’i bana irsâl edip tarafından geldikde, mârru’z-zikr dört yüz elli kantar samanı mezbûr el-Hâc İbrahim’e def‘ ve teslîm etmişdim, lâkin ben mârru’z-zikr samanın bahâsından müctemi‘ olan otuz altı bin akçemi mezbûr es-Seyyid Abdülkerim’den almayıp hâlâ zimmetinde kalmağın, mezbûr el-Hâc İbrahim’e suâl olunup zikr olunan samanı benden kabzına binâ’en semen-i mezbûru bana edâ ve teslîme tenbîh olunması matlûbumdur dedikde, müdde‘î-i mezbûrun takrîr-i meşrûhu üzre mezbûr el-Hâc İbrahim’e suâl olmağla, kendiye saman lâzım gelmeyip, ol vechile mezbûr el-Hâc İbrahim’e suâl dahi teveccüh etmemeğin, mezbûr Mehmed bî-vech mu‘ârazadan men‘ olunup, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İsmail Çelebi b. Mustafa, Mehmed Çelebi, Osman b. Osman, Hüseyin b. İbrahim, Mustafa b. Şaban, Ebûbekir b. Osman.