Bab Mahkemesi 54 Numaralı Sicil (H. 1102 / M. 1691) cilt: 20, sayfa: 381 Hüküm no: 464 Orijinal metin no: [81b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Receb’in Osman b. Abdullah’ta alacağı olması Husûs-ı âti’z-zikrin mahallinde ketb ü tahrîri için savb-ı şer‘den bi’t-taleb irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menzile varıp, zeyl-i kitâbda muharrerü’l-esâmi müslimîn huzûrunda akd-i meclis-i şer‘-i hatîr eyledikde, mezbûr el-Hâc Mehmed meclis-i ma‘kūd-ı mezkûrda zevcesi râfi‘atü hâze’l-kitâb Fâtıma Hâtun bt. Receb tarafından husûs-ı âti’z-zikri tasdîka vekîl olduğu zâtını ârifân Ali Çelebi b. Abdülmennân ve Mehmed Bey b. Ali şehâdetleriyle şer‘an sâbit olan İvaz Çelebi b. Abdullah nâm kimesne ile Osman b. Abdullah mahzarlarında ikrâr-ı tâm ve takrîr-i kelâm edip, bundan akdem zevcem müvekkile-i mezbûre Fâtıma Hâtun tarafından ben vekâleten mezbûr Osman’a üç yüz esedî guruş idâne ve teslîm, ol dahi istidâne ve kabz ve tesellüm etmişdi. Meblağ-ı mezbûr üç yüz esedî guruş zevcem müvekkile-i mezbûre Fâtıma Hâtun’un mülk ve hakkıdır, benim alâka ve medhalim yokdur dedikde, gıbbe’t-tasdîki’ş-şer‘î vâki‘ hâli mezbûr Bekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Mehmed ve Abdullah Efendi b. Veli ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’l-aşer min Cumâdelâhire li sene isneteyn ve mi’e ve elf. Şuhûdü’l-hâl: Umdetü’l-müderrisîni’l-kirâm es-Seyyid Sadeddin Mehmed Efendi b. el-merhûm es-Seyyid Mehmed Said Efendi, zübdetü’l-mehâdimi’l-kirâm es-Seyyid eş-Şeyh Mehmed Efendi b. el-müvelle’l-merhûmü’l-mezbûr, fahrü’l-müderrisîni’l-kirâm es-Seyyid eş-Şeyh Mehmed Efendi b. ( ), zübdetü’l-müdekkıkīni’l-fihâm Mehmed Efendi b. Ali, Mehmed Efendi b. Mustafa İmâm-ı Âbid Çelebi, Abdullah Efendi müezzin-i Âbid Çelebi, es-Seyyid Ebûbekir Çelebi b. Murtaza, Ali Çelebi b. Abdullah, Abdülkerim Efendi hoca-i mekteb, Mustafa Efendi halîfe-i mekteb, Abdülkādir Çelebi b. Ahmed, Süleyman Bey b. Mehmed, Mehmed Bey b. Ali, Hüseyin Efendi b. ( ), Yahya Efendi el-imâm ve Mustafa Çelebi b. ( ).