Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 491 Hüküm no: 511 Orijinal metin no: [125b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefine reislerinden Kalodi’nin, Mustafa’da kalan kereste navlunu bedeli hususunda sulh oldukları Sefîne reislerinden Kalodi v. Nikola nâm zimmî mahmiye-i İstanbul’da meclis-i şer‘de işbu râfi‘ü’l-vesîka el-Hâc Mustafa b. el-Hâc Mehmed nâm kimesne mahzarında ikrâr ve takrîr-i kelâm edip bundan akdem ben mezbûr el-Hâc Mustafa’nın Karadeniz’de Kerpe Limanında vâki‘ beynimizde ma‘lûm kerestesini yüz otuz guruş navl ve şayka ta‘bîr olunur sefînem ile liman-ı mezbûrdan mahmiye-i mezbûreye getürüp kendüye teslîm etmek üzere sefîneye vaz‘ ü tahmîl ve liman-ı mezkûrdan mahmiye-i mezbûreye getürüp kendüye teslîm etmekle navl-ı mezbûr yüz otuz guruşu mezbûr el-Hâc Mustafa’dan talep ve da‘vâ eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi, el-hâletü hâzihi beynimize muslihûn tavassut edip da‘vâ-i mezkûremden beni mezbûr el-Hâc Mustafa ile otuz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru mezbûr el-Hâc Mustafa yedinden tamâmen ahz u kabz edip husûs-ı mezbûra müte‘allıka âmme-i da‘vâdan mezbûr el-Hâc Mustafa’nın zimmetini ibrâ ve iskāt ve babası mezbûr el-Hâc Mehmed’in dahi zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: el-Hâc Ahmed b. el-Hâc Mehmed, Mustafa b. Mehmed, Ahmed b. Hasan, Mehmed b. İsmail, Mustafa b. Ahmed, Ahmed Çelebi gümrükcü.