Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 492 Hüküm no: 512 Orijinal metin no: [125b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Ağa’nın binasını Ariton adlı Ermeni’ye satması Bâ-imzâ-i Hazret efendi. Mahmiye-i İstanbul’da Kilidhanı’nda sâkin Ariton v. Tökel v. Serkis nâm Ermeni mahmiye-i mezbûrede meclis-i şer‘-i hatîrde mahmiye-i mezbûrede Sofular mahâllesinde sâkin işbu râfi‘ü’l-kitâb zahru’l-eşbâh Ebubekir Ağa b. el-Hâc Hüseyin nam kimesne [mahzarında] ikrâr ve takrîr-i kelâm edip târîh-i kitâb günü merkūm Ebubekir Ağa yedinde mülkü olup beynimizde ma‘lûm olan Bumcu? nâm ebniyesini üç bin beş yüz guruşa bâtten bana bey‘ ü teslîm ben dahi ber-vech-i muharrer iştirâ ve kabûl ve kabz ve istihâk etmekle semen-i mezkûr üç bin beş yüz guruşu vech-i meşrûh üzere merkūm Ebubekir Ağa’ya zimmetimde hâlâ vâcibü’l-edâ ve lâzimü’l-kazâ deynimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşere min-şehri Recebi’l-mürecceb li-sene sitte aşere ve mi’e ve elf. Şuhûdü’l-hâl: Süleyman b. Ebubekir, Ali Çavuş b. el-Hâc Mustafa, el-Hâc Mustafa b. Halil, Abdullah Çelebi b. Mehmed bazergân, Derviş Ağa b. el-Hâc Ahmed, Ali Ağa b. ( ), es-Seyyid Mahmud Çelebi b. Nuh, Mehmed Efendi b. Zülfikār, Zahru’l-akrân İbrahim Ağa b. Mahmud, Fahrü’l-eşbâh Abdullah Ağa telhîsî, el-Hâc Mehmed b. el-Hâc Mustafa.