Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 492 Hüküm no: 513 Orijinal metin no: [126a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtip Hasan Efendi’nin veraseti yeğeni Fatıma’ya münhasıra iken Fatıma’nın vefat etmesi üzerine verasetin diğer varislere taksimi Mahmiye-i İstanbul’da Zeyrek Câmi‘i kurbünde Kasab Demirhan mahâllesinde sâkin iken bundan akdem vefât [eden] Kâtip Hasan Efendi b. Ali b. Hasan’ın verâseti li-ebin er karındaşı kızı Fâtıma bt. Mehmed nâm hatuna münhasıra olup ba‘dehû mezbûre Fâtıma Hatun dahi fevt olup verâseti zevc-i metrûkü Halil Beşe b. Mustafa ile sadriye kebîre kızları Afîfe ve Hadîce ve sagīre kızı Rukıye’ye ve vâlidesi diğer Afîfe bt. Mehmed’e münhasıra olduğu lede’ş-şer‘ zâhir ve müte‘ayyin oldukdan sonra mezbûr Halil Beşe ile zâtı ma‘rifet-i şer‘iyye ile ârifân Ali b. Mustafa ve diğer Ali Beşe b. Mustafa nâm kimesneler ta‘rîfleriyle mu‘arrefe olan mezbûre diğer Afîfe asâleten ve mezbûretân Afîfe ve Hadîce taraflarından husûs-ı âti’l-beyana vekîl olduğu mezbûretânın zâtlarını ma‘rifet-i şer‘iyye ile ârifân yine mu‘arrefân-ı mezbûrân Ali ve diğer Ali Beşe şehâdetleriyle şer‘an sâbit olan es-Seyyid Ahmed Çelebi b. es-Seyyid İsmail nâm kimesne vekâleten ve sagīre-i mezbûre Rukıye’nin tesviye-i umûruna kıbel-i şer’den mansûb vasîsi olmağla vesâyeten mahmiye-i mezbûrede meclis-i şer‘de zikri âtî bahçeye ber-vech-i âtî vâzı‘ü’l-yed olan işbu râfi‘ü’l-kitâb İbrahim b. Ramazan nâm kimesne mahzarında her biri ikrâr ve takrîr-i kelâm edip mahâlle-i mezbûrda vâki‘ bir tarafdan ba‘zan es-Seyyid Ali Efendi b. Mustafa ve ba‘zan Bazergân el-Hâc Mehmed b. Ahmed’in veresesi mülkleri ve bir tarafdan ba‘zan Velizâde demekle ma‘rûf Mehmed Efendi mülkü ve ba‘zan Kundakçı el-Hâc Ali b. Abdullah ve ba‘zan Bakkāl el-Hâc Mehmed b. Mahmud tasarruflarında olan vakıf menziller ve bir tarafdan ( ) b. ( ) mülkü ve bir tarafdan tarîk-i âm ile mahdûd iki bi’r-i mâ’ ve iki tarafdan taş duvar ve kârgîr sed duvarı ve eşcâr-ı müsmire ve gayr-ı müsmireli mülk bahçe müteveffâ-yı evvel-i mezbûr Kâtib Hasan Efendi’nin ile’l-vefât mülkü olup ba‘de-vefâtihî ber-vech-i muharrer ırsen verese-i mezbûreye isâbet ve intikāl etmişidi deyü bahçe-i mezkûreyi mezbûr İbrahim’den taleb ve da‘vâ eylediğimizde ol dahi cevâbında bahçe-i mezkûr verese-i mezkûrûnun mûrisleri müteveffâ-yı evvel-i mezbûr Kâtib [Hasan] Efendi’nin hayâtında mülkü olduğunu ikrâr lâkin müteveffâ-yı evvel Kâtib Hasan Efendi hâl-i hayât ve kemâl-i akl [ü] sıhhatinde bahçe-i mahdûde-i mezkûreyi fâriğān ani’ş-şevâgil bana hibe-i sahîha-i şer‘iyye ile hibe ve temlîk ve teslîm ben dahi meclis-i hibede ittihâb ve kabûl ve kabz ve tesellüm eyleyip bu vech üzere bahçe-i mahdûde-i mezkûre benim mülk-i mevhûbum olduğundan mâ‘adâ verese-i mezkûrûnun mûriseleri müteveffât-ı sâniye-i mezbûre Fâtıma Hatun hayâtında ve bin yüz on bir senesi Zilka‘desi gurresinde mûrisim müteveffâ-yı evvel-i mezbûr Kâtib Hasan Efendi bahçe-i mahdûde-i mezkûreyi minvâl-i meşrûh üzere bana hibe ve teslîm eylediğini mukırra ve mu‘terife olduğundan gayri bahçe-i mahdûde-i mezkûra müte‘allıka cemî‘ da‘vâdan şuhûd mahzarında beni ibrâ ve iskāt eyledi ve kıbel-i şer‘den yedime bir kıt‘a ibrâ hücceti verilmişdir deyü da‘vâ-i def‘ ve mazmûnu min-külli’l-vücûh takrîr-i meşrûhuna mutâbıka bir kıt‘a hüccet-i şer‘iyye ibrâz ve mazmûnu hüccet-i mezbûreyi isbât etmesi dahi emr-i mukarer olup sulh sagīre-i mezbûre hakkında her vechile evlâ ve enfa‘ olduğu zeyl-i vesîkada muharrerü’l-esâmi Müslimîn ihbârlarıyla lede’ş-şer‘ sâbit olmağla beynlerimize muslihûn tavassut edip da‘vâ-i mezkûremizden bizi merkūm İbrahim ile altmış guruş üzerine sulh eylediklerinde biz dahi asâleten ve vekâleten sulh-ı mezbûru ba‘de’l-kabûl bedel-i sulh olan meblağ-ı mezbûr altmış guruşu her birimiz ber-vech-i muharrer bi-kadri’l-hısas merkūm İbrahim yedinden tamâmen ahz u kabz edip bahçe-i mahdûde-i mezkûra müte‘allıka âmme-i da‘vâdan biz müvekkilelerimiz mezbûretân Afîfe ve Hadîce’den her biri mezbûr İbrahim’in zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Recebi’l-ferd sene 1116. Şuhûdü’l-hâl: Süleyman Efendi b. Mehmed Efendi, Ahmed Efendi b. Muharrem Efendi, Ahmed Ağa b. Mehmed, İbrahim Çavuş b. el-Hâc Mehmed, Abdülbaki Çavuş b. Mehmed, Mehmed Çelebi b. Ahmed, Ahmed Çavuş b. ( ), Süleyman Ağa b. Ebubekir, Ali Çelebi b. Abdullah.