Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 494 Hüküm no: 514 Orijinal metin no: [126a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı Âlî yeniçerilerinden Mehmed Beşe’nin kendisini yaralayan Yeniçeri Hasan Beşe ile sulh olmaları Vilâyet-i Rumeli’nde Ustarova kazâsında Koca nâm karye ahâlîsinden ve dergâh-ı âlî yeniçerilerinden Mehmed Beşe b. Süleyman nâm kimesne mahmiye-i İstanbul’da meclis-i şer‘-i hatîrde kazâ-i mezbûr civârında Görice kazâsına tâbi‘ Bokaste nâm karyeden ve tâife-i mezbûreden Hasan Beşe b. Ali nâm kimesne mahzarında ikrâr ve takrîr-i kelâm edip târîh-i kitâbdan iki ay mukaddem mezbûr Hasan Beşe ile nizâ‘ımız olup birbirimizi kılıç ile kollarımızdan darb ve mecrûh eylediğimizden sonra malımdan beş guruş kıymetli bir kara kılıç ve yedi guruş kıymetli bir boylu tüfenk ve iki guruş kıymetli bir aba yağmurluğumu mezbûr Hasan Beşe ahz u kabz etmişidi hâlâ zikr olunan kılıç ve tüfenk ve yağmurluğumun aynları mevcûd olmağla mezbûr Hasan Beşe bi’t-terâzî bana teslîme ta‘ahhüd edip ben dahi kabûl eylediğimden sonra cerh-i mezbûra ve mâ-yehdesü minhuya müte‘allıka âmme-i da‘vâdan ben mezbûr Hasan Beşe’yi ibrâ ve iskāt edip ol dahi kezâlik husûs-ı mezkûra müte‘allıka âmme-i da‘vâdan benim zimmetimi ibrâ ve iskāt eyledi [126b] fîmâ-ba‘d birbirimiz ile eşyâ-i mezkûreden mâ‘adâ aslâ da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Aziz Beşe b. Ahmed, Bayram Beşe b. Ali, Osman Beşe b. Mehmed, Hasan Beşe b. Osman, Bektaş Beşe b. Hüseyin, Ali Beşe el-mübâşir.