Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 494 Hüküm no: 515 Orijinal metin no: [126b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar taifesinden olup İstanbul’da Vezirhanı’nda vefat eden Agob’un borcu kaldığı yolundaki iddiaların geçersiz olduğu Tüccâr tâifesinden olup mahmiye-i İstanbul’da Vezirhanı’nda sâkin iken bundan akdem hâlik olan Agob v. Serkis nâm zimmînin verâseti zevce-i metrûkesi Meleket bt. Simaven nâm Nasrâniye ile sulbî oğlu Serkis’e münhasıra olup ba‘dehû mezbûr Serkis hâlik olup verâseti vâlidesi mezbûre Meleket ile ammi oğlu Bağdasar’a münhasıra ve tashîh-i meseleleri bi-tarîkı’l-münâsaha yirmi dört sehmden olup sihâm-ı mezbûrenin on sehmi merkūme Meleket’e ve on dört sehmi mezbûr Bağdasar’a isâbeti tahakkukundan sonra merkūm Bağdasar mahmiye-i mezbûrede meclis-i şer‘de işbu râfi‘ü’s-sifr Ariton v. Aleksan nâm zimmî muvâcehesinde üzerine da‘vâ ve takrîr-i kelâm edip işbu merkūm Ariton bundan akdem gāib ani’l-meclis Kara Safer v. David v. Safer nâm zimmînin vekîl-i şer‘îsi olmağla müvekkili merkūm Safer hâlik-i evvel merkūm Agob’un zimmetinde cihet-i şer‘iyyeden hakkım vardır deyü terekesinden bi-gayrı hakkın üç bin dört yüz guruş ahz ve masârıfına sarfla istihlâk etmişidi deyü meblağ-ı mezbûrdan tarîk-i mezkûr üzere hisse-i ırsiyemi merkūm Ariton’dan huzûr-ı hâkimü’ş-şer‘de taleb ve da‘vâ eylediğimde ol dahi müvekkil-i merkūm Kara Safer’in vücûh-ı ticâretde mukaddemâ şerîki olup diyâr-ı Acem’den Tebriz? kasabasında sâkin Ahıcan v. Pîrî nâm Ermeni merkūm Kara Safer’in malından üç bin dört yüz guruşunu mahmiye-i mezbûrede merkūm Kara Safer’e teslîm etmek üzere hâlik-i evvel merkūm Agob’a def‘ ü teslîm ol dahi yedinden ber-vech-i muharrer ahz u kabz etdiğinden sonra meblağ-ı merkūmu müvekkil-i merkūm Kara Safer’e kable’t-teslîm yedinde iken merkūm Agob hâlik oldukda merkūm Kara Safer meblağ-ı mezbûrun yüz yirmi guruşunu hâlik-ı sânî mezbûr Serkis’e hibe ve temlîk edip bâkī üç bin iki yüz seksen guruşunu hâlik-i merkūmun terekesinden bi-hakkın ahz u kabz eylediğini yedinde olan hüccet-i şer‘iyye mûcibince muvâcehemde tüccârdan Van kasabası ahâlîsinden olup mahmiye-i mezbûrede müsâfiren sâkin Serkiz v. Sakomi Keşiş ve Azar v. Toma nâm zimmîler şehâdetleriyle şer‘an bi’l-vekâle isbât etmişidi, hâlâ merkūm Ariton mücerred ol vakitde benimle husûmete vekîl olmağın meblağ-ı mezbûr üç bin iki yüz seksen guruşdan hisse-i ırsiyemi merkūm Ariton’dan taleb ederim suâl olunsun dedikde müdde‘î-i merkūm Bağdasar’ın takrîr-i meşrûhu üzere meblağ-ı mezbûr üç bin iki yüz seksen guruşdan merkūm Ariton’a hisse taleb ve da‘vâsı meşrû‘a olmayıp merkūm Ariton’a suâl dahi tevcîh etmemeğin merkūm Bağdasar bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd sene 1116. Şuhûdü’l-hâl: Ali Efendi b. Ahmed Efendi, el-Hâc Mehmed Efendi b. Ahmed Efendi, İsmail Efendi el-kādı, Ömer Efendi el-kādı, Veli Efendi el-kādı, Emin Mehmed Efendi el-kādı, el-Hâc Yusuf b. Osman.