Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 496 Hüküm no: 517 Orijinal metin no: [127a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraybosna Cizyedarı Hüseyin Ağa’nın borcuna Ali Ağa b. Yusuf ve Ali Ağa b. Abdullah’ın kefil olmaları Bin yüz üç senesinde Saraybosna keferesi cizyedârı olan Hüseyin Ağa b. Mustafa b. Mehmed mahmiye-i mezbûrede meclis-i şer‘de tüccârdan işbu râfi‘ü’s-sifr Gavril v. Avron nâm Yahûdî muvâcehesinde ikrâr ve takrîr-i kelâm edip işbu merkūm Gavril’e cihet-i karz-ı şer‘îden altı bin sekiz yüz kırk beş guruş deynim olmağla meblağ-ı mezbûrun beş yüz guruşunu târîh-i kitâbdan otuz gün tamâmına edâya ta‘ahhüd edip bâkī altı bin üç yüz kırk beş guruşunu icâleten edâya iktidârım olmayıp tedrîc ile edâ etmek üzere istimhâl etdiğimde ol dahi meblağ-ı bâkī-i mezbûru te‘hîr ve imhâl eyledi hâlâ mecmû‘-ı mebâliğ-i mezbûr altı bin sekiz yüz kırk beş guruş merkūm Gavril’e ber-vech-i muharrer zimmetinde vâcibü’l-edâ deynimdir dedikde gıbbe’t-tasdîkı’l-mu‘teber mahmiye-i mezbûrede Ma‘cûncu mahâllesi ahâlîsinden Ali Ağa b. Yusuf b. Mehmed ve Galata muzâfâtından kasaba-i Kasımpaşa’da Kasımpaşa mahâllesi ahâlîsinden diğer Ali Ağa b. Abdullah b. Abdurrahman meclis-i mezkûrda her biri ikrâr ve takrîr-i kelâm edip biz dahi işbu medyûn-ı mezkûr Hüseyin Ağa’nın nefsine ve hîn-i mutâlebede meclis-i şer‘e ihzârına ve firâr ve gaybet ederse zimmetinde olan mecmû‘-ı meblağ-ı mezbûr altı bin sekiz yüz kırk beş guruşa emr u kabûlü hâviye kefâlet-i sahîha-i şer‘iyye ile her birimiz ma‘an kefil olduk dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd sene 1116. Şuhûdü’l-hâl: Fahrü’l-akrân Şeyhî Mehmed Efendi, Fahrü’l-küttâb Abdülbaki Efendi kâtib-i gedikliyân, Fahrü’l-küttâb Mustafa Efendi kâtib-i alemşâhî, Mustafa Çavuş el-mübâşir, İvaz Çavuş b. Şaban, Hüseyin b. İbrahim.