Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 497 Hüküm no: 518 Orijinal metin no: [127a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un boşandığı eşi Süleyman Bey’de kalan alacağını talep etmesi Mahmiye-i İstanbul’da Cibâli kapısı kurbünde sâkine Âişe Hatun bt. İsmail mahmiye-i mezbûrede meclis-i şer‘de zevc-i sâbıkı Süleyman Bey b. Ahmed mahzarında üzerine da‘vâ ve takrîr-i kelâm edip işbu mezbûr Süleyman Bey bundan akdem zevciyet beynimizde kāime olduğu hâlde malımdan bin beş yüz guruş kıymetli eşyâ-i ma‘lûmemi fuzûlî bey‘ ve semenini masârıfına sarfla istihlâk etmeğin meblağ-ı merkūmu mezbûr Süleyman Bey’den talep ve da‘vâ eylediğimde vesâtet-i muslihîn ile da‘vâ-i mezkûrumdan benimle beş yüz guruş üzerine sulh olup bedel-i mezbûr zimmetinde bana deyni olmak üzere yedime bir kıt‘a deyn temessükü dahi vermekle hâlâ bedel-i mezbûrun on guruşunu yedinden ahz u kabz ve istîfâ edip bâkī dört yüz doksan guruşunu mezbûr Süleyman Bey’den talep eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Süleyman Bey cevâbında fi’l-vâki‘ cihet-i mezbûrdan müdde‘ıye-i mezbûre Âişe Hatun’a zimmetinde bâkī dört yüz doksan guruş deyni olduğunu ikrâr ve i‘tirâf etmeğin mûcibince meblağ-ı bâkī-i mezbûr dört yüz doksan guruşu müdde‘iye-i mezbûre Âişe Hatun’a edâ ve teslîme mezbûr Süleyman Bey’e tenbîh olunup mâ-vaka‘a bi’t-taleb ketb olundu. Fi’l-yevmi’s-sâlisi aşere min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Sofu Mehmed b. ( ), Üstâd Halil b. ( ), Üstâd Abdülbaki b. ( ), Bektaş Ali b. ( ), Ali Efendi b. Ahmed, Mehmed Efendi b. Ahmed, el-Hâc Yusuf b. Osman.