Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 497 Hüküm no: 519 Orijinal metin no: [127a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın borçlarını vekili Ahmed Ağa’nın ödediği Mahmiye-i İstanbul’da Yedikule kurbünde Bucakbağ mahâllesi ahâlîsinden Halil Ağa b. Mustafa b. Sinan tarafından husûs-ı âti’l-beyana vekîl olduğu mahâlle-i mezbûre ahâlîsinden Osman b. Mehmed ve Ahmed b. Mehmed şehâdetleriyle şer‘an sâbit olan İbrahim b. Hüseyin nâm kimesne mahmiye-i mezbûrede meclis-i şer‘de işbu bâ‘isü’l-kitâb el-Hâc Ahmed Ağa b. Üveys mahzarında bi’l-vekâle ikrâr ve takrîr-i kelâm edip müvekkilim mezbûr Halil bundan akdem dokuz yüz seksen bir guruş ve sekiz adet Mısrî parayı nâtık bir kıt‘a hazîne tezkeresini dört yüz guruş ile yetmiş zirâ‘ Londorine çukaya âhara bey‘ ve semeninden gāib ani’l-meclis el-Hâc Mehmed Çelebi b. Veliyüddin’e olan dört yüz elli dokuz guruş deyni ile sâir ma‘lûmü’l-esâmi kimesnelere olan düyûn-ı müteferrikasını edâya mezbûr el-Hâc Ahmed Ağa’yı tevkîl [127b] ikrâr etmişidi. Hâlâ mezbûr el-Hâc Ahmed Ağa mezbûr Halil Ağa’nın tevkîl ve emrine binâen zikr olunan tezkiremi dört yüz guruş ile yetmiş zirâ‘ Londorine çukaya bey‘ ve semeninden gāib-i mezbûr el-Hâc Mehmed Çelebi’ye olan dört yüz elli dokuz guruş deyni ile sâir ma‘lûmü’l-esâmi kimesnelere olan düyûn-ı müteferrikasını her birine edâ ve teslîm edip semen-i mezbûrdan yedinde ve zimmetinde bir akçe ve bir habbe bâkī kalmadığı müvekkilim mezbûr Halil Ağa’nın ma‘lûmu olmağla zikr olunan hazîne tezkiresine müte‘allıka âmme-i da‘vâ ve kâffe-i mutâlebâttan işbu mezbûr el-Hâc Ahmed Ağa’nın zimmetini ibrâ ve iskāt eyledi min-ba‘d müvekkilim mezbûr Halil Ağa’nın mezbûr el-Hâc Ahmed Ağa ile sâlifü’z-zikr hazîne tezkiresine müte‘allıka vechen mine’l-vücûh aslâ da‘vâ ve nizâ‘ı yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Ahmed Çelebi b. İbrahim, Mehmed Çelebi b. Ahmed, İvaz Çavuş el-mübâşir, Ali Efendi b. Ahmed Efendi, el-Hâc Mehmed Efendi b. Ahmed, Mehmed Efendi el-kādı, Veli Efendi el-kādı, el-Hâc Yusuf b. Osman.