Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 498 Hüküm no: 520 Orijinal metin no: [127b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahibiye Medresesi vakfına ait Kilis’e tâbi Kefer Silvan köyünün vergisini deruhde eden Mustafa’nın iltizam bedelini ödediği Medîne-i Haleb’de vâki‘ Sâhibiye Medresesi’nin bi’l-fi‘il mütevellîsi olan Nazımü’l-mültekā Mehmed Efendi b. Fahreddin nâm kimesne mahmiye-i İstanbul’da meclis-i şer‘-i hatîrde es-Seyyid el-Hâc Mustafa b. Es-Seyyid Yusuf eş-şehîr bi’l-Kaçarânî? nâm kimesne mahzarında bi’t-tevliye ikrâr ve takrîr-i kelâm edip vakf-ı mezbûr kurâsından Kilis kazâsında Ağzaz nâhiyesine tâbi‘ Kefer Silvan nâm karyenin a‘şâr-ı şer‘iyye ve rüsûm-ı örfiyesini işbu târîh-i senesi Zilka‘desinin on altıncı gününde vâki‘ Mart ibtidâsından sene tamâmına değin zabt etmek üzere senede voyvoda maktu‘û olan yüz elli guruşdan mâ‘adâ otuz guruş bedel mukābelesinde mezbûr es-Seyyid el-Hâc Mustafa’ya der-uhde ve iltizâm ol dahi ber-vech-i muharrer iltizâm ve kabûl eylediğinden sonra bedel-i iltizâmı olan meblağ-ı mezbûr dört yüz guruşdan kırk guruşunu hâlâ mezbûr es-Seyyid el-Hâc Mustafa bana def‘ ü teslîm ben dahi yedinden bi’t-tevliye ahz u kabz edip bâkī kalan üç yüz altmış guruşunu medrese-i mezbûre müderrisine vazîfesi mukābelesinde verip ve fazlası olan üç yüz guruşdan dahi medrese-i mezbûrenin sene-i merkūmede lâzım gelen ta‘mîrine medîne-i mezbûrede vekîlim Ömer Efendi ma‘rifetiyle kifâyet mikdârı harc u sarf edip bundan dahi bâkī kalan meblağı senesi âharında bana def‘ ü teslîm etmek üzere beynimizde bi’t-terâzî kabûl ve ittifâk ve ahd-i mîsâk eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Mehmed b. el-Hâc Hüseyin, eş-Şeyh Mustafa b. ( ), es-Seyyid Taha Çelebi b. el-Hâc Hicâzî, es-Seyyid Abdullah el-hatîb, el-Hâc Mehmed b. ( ), el-Hâc Abdülvahhab.