Bab Mahkemesi 54 Numaralı Sicil (H. 1102 / M. 1691) cilt: 20, sayfa: 382 Hüküm no: 465 Orijinal metin no: [81b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın borç ikrarı ve vasiyeti Husûs-ı âti’z-zikrin mahallinde ketb ve tahrîri için savb-ı şer‘den matlûben irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menziline varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘ eyledikde, mezbûr el-Hâc Mehmed meclis-i ma‘kūd-ı mezbûrda râfi‘ü hâze’l-kitâb İvaz Çelebi b. Abdülmennân mahzarında ikrâr ve takrîr-i kelâm edip, [mahalle-i] mezbûre sâkinelerinden iken bundan akdem fevt olan Ümmühâni Hâtun bt. İbrahim’in sadrî sagīr oğlu Musa’nın ben vasîsi olmağla, müteveffât-ı mezbûreden ber-mûceb-i defter-i kassâm irsen kendiye isâbet eden dokuz bin üç yüz otuz altı akçe kıymetli bir re’s câriye ve eşyâ ile nakid yirmi dört bin beş yüz elli altı akçesini ben bi’l-vesâye ba‘de’l-ahz, meblağ-ı mezbûru imâl edip nemâsından iki bin dört yüz akçe hâsıl olmağla, asl-ı mâl merkūm yirmi dört bin beş yüz elli altı akçe ile nemâsından hâsıl olan meblağ-ı mezbûr iki bin dört yüz akçe ki, cem‘an yirmi altı bin dokuz yüz elli altı akçeyi kendi mesârifime sarfla istihlâk eyledim. bi emrillâhi te‘âlâ fevt olduğumda terekemi ba‘de’l-kabz techîz ve tekfînimi gördükden sonra meblağ-ı mezbûr yirmi altı bin dokuz yüz elli altı akçeyi terekemden sagīr-i mezbûra edâya mezbûr İvaz Çelebi’yi vasiyy-i muhtâr nasb ve ta‘yîn edip, ol dahi vesâyet-i mezbûreyi kabûl ve merâsimini edâya ta‘ahhüd eyledi dedikde, gıbbe’t-tasdîki’ş-şer‘î vâki‘ hâli mezbûr Ebûbekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Mehmed ve Abdullah Efendi b. Veli ile meclis-i şer‘a gelip alâ vukū‘ihî inhâ etmeğin, mâ vaka‘a bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene isneteyn ve mi’e ve elf. Şuhûdü’l-hâl: Sâbıkūn.