Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 499 Hüküm no: 521 Orijinal metin no: [127b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanbolulu Abdullah Ağa’nın varislerinden annesi Safiye’nin Hasan Bey’i vekil etmesi Hassa saraclarından olup vilâyet-i Rumeli’nde Yanbolu kasabası mahâllâtından el-Hâc Mustafa mahâllesinde sâkin iken bundan akdem fevt olan Abdullah Ağa b. Abdullah’ın verâseti mahrûse-i Galata muzâfâtından kasaba-i Beşiktaş’da Sinanpaşa mahâllesinde sâkine vâlidesi Safiye bt. Abdullah ile sagīr oğlu Mehmed’e ve mârrü’z-zikr Yanbolu kasabasında sâkine sagīre kızları Ümmügülsüm ve Afîfe’ye münhasıra ve mesele-i mîrâsı bi-tarîkı’r-red beş sehmden olup sihâm-ı mezbûrûnun bir sehmi mezbûre Safiye Hatun’a ve iki sehmi sagīr-i mezbûr Mehmed’e ve birer sehmi sagīretân-ı mezbûretân Ümmügülsüm ve Afîfe’den her birine isâbeti tahakkukundan sonra mezbûre Safiye Hatun zâtı ba‘de’t-ta‘rîfi’ş-şer‘î mahmiye-i İstanbul’da meclis-i şer‘de işbu râfi‘ü’l-vesîka Hasan Bey b. Mehmed mahzarında ikrâr ve takrîr-i kelâm edip oğlum müteveffâ-yı mezbûr Abdullah Ağa’nın terekesinden benim bir sehim [128a] ırsiye-i şer‘iyyemi kasaba-i Yanbolu’da vâzı‘ü’l-yed olanlardan talep ve da‘vâ ve ahz u kabzına ve bana îsâle ve ahz u kabz ve îsâl mütevakkıf olduğu umûrun küllîsine tarafımdan işbu mezbûr Hasan Bey’i vekîl ve nâib-i menâb nasb u ta‘yîn eyledim dedikde mezbûr Hasan Bey dahi vekâlet-i merkūmeyi kabûl ve hizmet-i lâzimesini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Mustafa Efendi b. Ahmed, Mahmud Ağa b. Mehmed, Ahmed Ağa b. Serharbendegân-ı hâssa, Receb harbende-i hâssa, Ali odabaşı harbende-i hâssa, Hüseyin odabaşı harbende-i hâssa.