Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 499 Hüküm no: 522 Orijinal metin no: [128a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanbolu’da vefat eden Hassa saraclarından Abdullah Ağa’nın küçük oğlu Mehmed için Hasan Bey’in vasi tayini Hassa saraclarından olup vilâyet-i Rumeli’nde Yanbolu kasabası mahâllâtından el-Hâc Mustafa mahâllesinde sâkin iken bundan akdem fevt olan Abdullah Ağa b. Abdullah’ın verâseti mahrûse-i Galata muzâfâtından kasaba-i Beşiktaş’da Sinanpaşa mahâllesinde sâkine vâlidesi Safiye bt. Abdullah ile sagīr oğlu Mehmed’e ve kasaba-i Yanbolu kasabasında sâkine sagīre kızları Ümmügülsüm ve Afîfe’ye münhasıra olduğu lede’ş-şer‘ zâhir ve mütehakkık oldukdan sonra sagīr-i merkūm Mehmed’in tesviye-i umûruna kıbel-i şer‘den bir vasî nasb u ta‘yîn olunmak lâzim ve mühim olmağın hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ lehû ve hüsnü-meâb hazretleri dahi vesâyete ehil olduğu zeyl-i kitâbda isimleri mastûr olan Müslimîn ihtiyârlarıyla mütehakkık olan işbu râfi‘ü’l-vesîka Hasan Bey b. Mehmed’i sagīr-i mezbûr üzerine vasî nasb u ta‘yîn etdikde ol dahi vesâyet-i merkūmeyi kabûl ve merâsimini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Mustafa Efendi b. Ahmed kaşıkcı, Mahmud Ağa b. Mehmed serrahtvân-ı hâssa, Ahmed Ağa serharbendegân-ı hâssa?, Ali odabaşı harbendegân-ı Hâssa, Hüseyin odabaşı harbende-i hâssa.