Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 502 Hüküm no: 525 Orijinal metin no: [129a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Matyos ile Receb b. Mehmed arasında ortaya çıkan alacak verecek davasında anlaşma sağlandığı Sarrâf tâifesinden Matyos v. Mardıros nâm Ermeni mahmiye-i İstanbul’da meclis-i şer‘de işbu râfi‘ü’l-vesîka el-Hâc Receb b. Mehmed nâm kimesne mahzarında ikrâr-ı tam ve takrîr-i kelâm edip işbu mezbûr el-Hâc Receb bundan akdem beş yüz guruş ile dâyinim olan Ali Ağa nâm kimesnenin tarafından meblağ-ı mezbûru benden ahz u kabza vekîl olmağla meblağ-ı merkūmu bana te’hîr ve imhâl için ayda beşer guruşdan on iki ayda altmış guruş ve bir def‘a dahi otuz iki buçuk guruş ki bi-gayrı hakkın cem‘an doksan iki buçuk guruşumu ahz u kabz etmekle meblağ-ı mezbûru merkūm el-Hâc Receb’den taleb ve da‘vâ eylediğimde ol dahi meblağ-ı merkūmun yirmi dokuz guruşunu ikrâr, ziyâde altmış üç buçuk guruşunu inkâr etmeğin beynimizde münâza‘ât-ı kesîre cereyân etmişidi el-hâletü hâzihi mezbûr el-Hâc Receb vesâtet-i muslihîn ile da‘vâ-i mezkûrumdan beni elli guruş üzerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr elli guruşu yedinden tamâmen ahz u kabz edip bâkī kırk iki buçuk guruşa müte‘allıka âmme-i da‘vâ’dan mezbûr el-Hâc Receb’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi ve’l-ışrîn min-Recebi’l-mürecceb li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed Efendi b. Ahmed, Ömer Efendi el-kādı, Veliyüddin Efendi el-kādı, Emin Mehmed Efendi el-kādı, Mustafa Efendi el-kādı.