Bab Mahkemesi 54 Numaralı Sicil (H. 1102 / M. 1691) cilt: 20, sayfa: 383 Hüküm no: 466 Orijinal metin no: [81b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın borç ikrarı ve vasiyeti Husûs-ı âti’z-zikrin mahallinde ketb ve tahrîri için savb-ı şer‘den bi’t-taleb irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menziline varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i hatîr eyledikde, mezbûr el-Hâc Mehmed meclis-i ma‘kūd-ı mezbûrda râfi‘ü hâze’l-kitâb İvaz Çelebi b. Abdullah mahzarında ikrâr-ı tâm ve takrîr-i kelâm edip, bundan akdem fevt olan el-Hâc Hüseyin Ağa b. Mehmed’in evlâd-ı sıgārı Mehmed ve Ahmed ve Abdullah’ın tesviye-i emirlerine ben vasiyy-i muhtârları olmağla, sıgār-ı mezbûrûn Mehmed ve Ahmed ve Abdullah’a babalarından müntakil mâllarından ber-mûceb-i defter-i kassâm-ı askerî ve hâric ez-defter-i kassâm nukūddan ve zimem-i nâsda olan hukūkundan ve nemâsından hâsıl olan min haysü’l-mecmû‘ dört yük altı bin beş yüz yirmi altı akçelerini bi’l-vesâye ahz u kabz ve kendi mesârifime sarfla istihlâk etmişdim, meblağ-ı mecmû‘-ı mezbûr dört yük altı bin beş yüz yirmi altı akçe sıgār-ı mezbûrûna zimmetimde deynim olmağla, ben bi emrillâhi te‘âlâ fevt olduğumda, mezbûr İvaz Çelebi cemî‘-i terekemi kabz ve terekemden [82a] mu‘tâd-ı kadîm üzre techîz ve tekfîn ve mesârif-i defnimi gördükden sonra terekemden meblağ-ı mezbûr dört yük altı bin beş yüz yirmi altı akçeyi sıgār-ı mezbûrûna ve sâir düyûn-ı müsbetemi erbâbına edâ ve teslîm eyledikden sonra bâkī terekemi vereseme teslîm eyleye deyu vasiyyet ve tenfîzine merkūm İvaz Çelebi’yi vasiyy-i muhtâr nasb ve ta‘yîn edip, ol dahi vesâyet-i mezbûreyi kabûl ve merâsimini edâya ta‘ahhüd eyledi dedikde, gıbbe’t-tasdîki’ş-şer‘î vâki‘ hâli mezbûr Ebûbekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Mehmed ve Abdullah Efendi b. Veli ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene isneteyn ve mi’e ve elf. Şuhûdü’l-hâl: Sâbıkūn.