Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 515 Hüküm no: 538 Orijinal metin no: [132b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Filibi v. Papa Metoli’nin, kölesini zorla gasb eden Nikola hakkındaki davası Mahrûse-i Galata’da Karaki kapısı kurbünde sâkin Filibi v. Papa Metoli (?) nâm zimmî mahmiye-i İstanbul’da meclis-i şer‘de işbu rafi‘ü’s-sifr Nikola v. Dimitri nâm zimmî muvâcehesinde ikrâr ve takrîr-i kelâm edip bundan akdem Bahr-ı sefîd’de vâki‘ İncirli Adası’na vardığımda mezbûr Nikola ada-i mezkûrda subaşı olmağla Malta esirlerinden ve Adana mütesellimi Ali Ağa nâm kimesneden üç yüz guruş semen-i medfû‘a iştirâ eylediğim Kapudan Petruhi nâm gulâmımı mezbûr Nikola bi-gayrı hakkın cebren ahz u gasb ve istihlâk etmişidi deyü gulâm-ı mezkûrun kıymeti olan meblağ-ı mezbûr üç yüz guruşu bi-tarîkı’d-damân mezbûr Nikola’dan taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vâki‘ olmuş idi. El-hâletü hâzihi beynimizde muslihûn tavassut edip da‘vâ-i mezkûremden beni merkūm Nikola ile yüz elli guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz elli guruşu merkūm Nikola yedinden ahz u kabz edip husûs-ı mezkûra müte‘allıka âmme-i da‘vâ ve kâffe-i mutâlebâtdan ben mezbûr [133a] Nikola’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim, mezbûr Nikola dahi bedel-i sulh deyü bana medfû‘u olan meblağ-ı mezbûr elli guruşa müte‘allıka cemî‘ da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Mustafa Çavuş b. Osman, İsmail Efendi b. el-Hâc Siyavuş, Edip Mustafa Efendi b. Abdüllatif Efendi, İslâm Çelebi b. Mehmed, Haffâf el-Hâc Mustafa b. Abdüllatif. Katlo v. Aleksandri, Yani v. Nikola, Yorgi v. Dimitri, Yani v. Diyako, Toma v. Katakalo, Nikola v. Andoni, Dimitri v. Anaştaş, Franci v. Anderya.