Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 515 Hüküm no: 539 Orijinal metin no: [133a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaptan Hüseyin Paşa’nın küçük oğlu, ümera-i deryadan Ali Paşa’nın Karadeniz’de Ereğli limanında batan gemisinin yerine yenisinin yaptırılmasına izin verildiği Bâ-imzâ-i Hazret-i veliyyü’n-ni‘am Mahrûse-i Galata’ya tabi kasaba-i Fındıklı’da sâkin ve bi’l-fi‘il kapudan iken bundan akdem vedâ‘-ı âlem-i fânî eden merhûm el-Hâc Hüseyin Paşa’nın sulbî sagīr oğlu ve ümerâ-i deryâdan Ali Paşa’nın tesviye-i umûruna kıbel-i şer‘den mansûb vâsîsi ve kezâlik ümerâ-i deryâdan emîrü’l-ümerâi’l-kirâm Mehmed Paşa b. Muslı mahmiye-i İstanbul’da meclis-i şer‘de bi’l-vesâye takrîr-i kelâm ve ta‘bîr ani’l-merâm edip işbu yedimde olan bir kıt‘a buyruldu-yı şerîf nâtık olduğu üzere vasîsi olduğum sagīr-i mezbûr Ali Paşa ber-vech-i muharrer ümerâ-i deryâdan olup sagīr-i mezbûrun çekdiri ta‘bîr olunur sefînesi işbu sene-i mübârekede bi-emrillâh Karadeniz’de Ereğli limanında fırtınadan nâşî karaya düşüp helâk olmağla sagīr-i mezbûr için müceddeden çekdiri yapdırılmış bana fermân-ı âlî sâdır olduğundan mâ‘adâ mîr-i sagīr-i mezbûr için taraf-ı Saltanat-ı aliyye’den ta‘yin olunan salyâne çekdiri mukābelesine olup çekdiri yapdırılmadığı takdirce salyâne üzerinden ref‘ olunmak ihtimâl ve zarâr-ı küllî olup müceddeden çekdiri yapdırılması mîr-i sagīr-i mezbûr hakkında her vechile evlâ ve enfa‘ olmağla hakīkat-i hâl zeyl-i vesîkada muharrerü’l-esâmi Müslimînden istihbâr ve ben bi’l-vesâye mîr-i sagīr-i mezbûr için müceddeden çekdiri yapdırmağa kıbel-i şer‘den bana izin ve yedime hüccet verilmek matlûbumdur deyü mazmûnu min-külli’l-vücûh takrîr-i meşrûhuna mutâbık bir kıt‘a buyruldu-yı şerîf ibrâz edip Müslimûn-ı mezbûrûn istintak olunduklarında fi’l-vâki‘ mîr-i sagīr-i mezbûr minvâl-i meşrûh üzere sefînesi helâk olup mîr-i sagīr-i mezbûr için müceddeden çekdiri yapdırılmadığı takdirce salyâne üzerinden ref‘ olunmak ihtimâli ve zarâr-ı küllî terettüb eder müceddeden çekdiri yapdırılması mîr-i sagīr-i mezbûr hakkında her vechile evlâ ve enfa‘dır deyü alâ tarîkı’ş-şehâde haber vermeleriyle mîr-i sagīr-i mezbûr için müceddeden çekdiri yapdırmağa vâsîsi mîr-i mûmâ-ileyhe kıbel-i şer‘den izin verilmeğin mâ-vaka‘a bi’t-taleb ketb olundu. Fi’l-[yevmi’l]-hâmis ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Süleyman Ağa b. Ebubekir, Süleyman Efendi b. Ataullah, Ali Bey b. Abdullah, Mahmud Bey b. Abdullah.