Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 516 Hüküm no: 540 Orijinal metin no: [133a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın Süleyman Ağa’dan aldığı borcunu ödediği Mahmiye-i İstanbul’da Hayadarpaşa mahâllesinde sâkin el-Hâc Ali Ağa b. Musa b. Ali nâm kimesne mahmiye-i mezbûrede meclis-i şer‘de işbu sâhibü’l-kitâb fahrü’l-emâsil ve’l-akrân Süleyman Ağa b. Ebubekir nâm kimesne mahzarında ikrâr-ı tam ve takrîr-i kelâm edip mezbûr Süleyman Ağa yedinden verdiğim mümzâ ve mahtûm işbu bir kıt‘a deyn temessükü nâtık olduğu üzere târîh-i kitâb senesi mâh-ı Cemâziyelevveli gurresinde malından bana bin iki yüz doksan altı guruş ikrâz ve teslîm ben dahi iktirâz ve kabz ve istihlâk edip bu vech üzere meblağ-ı mezbûr bin iki yüz doksan altı guruş merkūm Süleyman Ağa’ya zimmetimde vâcibü’l-edâ ve lâzımü’l-kazâ deynim olmağla meblağ-ı mezbûrda ribâya ve târîh-i kitâba gelince sâir beynimizde cereyân eden ahz u i‘tâ ve mu‘amelât-ı şettâ ve hukūk-ı ma‘lûme ve mechûleye [133b] müte‘allıka âmme-i da‘vâ ve kâffe-i mutâlebâtdan mezbûr Süleyman Ağa’nın zimmetini ibrâ-i âmm-ı kātı‘ü’n-nizâ‘la ibrâ‘ ve iskāt eyledim dedikde gıbbe’t-tasdîkı’ş-şer‘î mahâlle-i mezbûre sükkânından fahrü’l-müderrisîni’l-kirâm Mehmed Efendi b. Ahmed b. Yahya ve Kethüdâ Osman Ağa b. Ömer b. Hasan nâm kimesnelerden her biri müstakillen merkūm Süleyman Ağa’nın hüccet-i mezkûreden mezbûr el-Hâc Ali Ağa zimmetinde hakkı olan meblağ-ı mezbûr bin iki yüz doksan altı guruşa tarafeynden ibrâ‘ ve kabûlü hâviye kefâlet-i sahîha-i şer‘iye ile kefil ve dâmin olduk dediklerinde mâ-hüve’l-vâki‘ bi’t-taleb ketb olundu. Fî-gurreti Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Fahrü’l-müderrisîn Mehmed Raşid Efendi, İbrahim Efendi b. Ataullah, Mustafa Efendi b. İbrahim, Süleyman Efendi b. Şaban, İsmail Çelebi b. Mehmed, es-Seyyid Ahmed Efendi b. Mustafa Efendi.