Bab Mahkemesi 54 Numaralı Sicil (H. 1102 / M. 1691) cilt: 20, sayfa: 383 Hüküm no: 467 Orijinal metin no: [82a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın Hüseyin Ağa Vakfı’na borcu olduğu Husûs-ı âti’z-zikrin mahallinde ketb ü tahrîri için savb-ı şer‘den irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menziline varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i hatîr eyledikde, mezbûr el-Hâc Mehmed meclis-i ma‘kūd-ı mezbûrda Hüseyin Ağa Vakfı’na bi’l-fi‘il mütevellî olan Ali Çelebi b. Abdülmennân mahzarında ikrâr-ı tâm ve takrîr-i kelâm edip, bundan akdem mütevellî-i merkūm Ali Çelebi asl-ı mâl-ı vakf-ı mezbûrdan bana iki yüz esedî guruş idâne ve teslîm, ben dahi istidâne ve kabz ve tesellüm etmişdim. El-ân meblağ-ı mezbûr iki yüz esedî guruşu vakf-ı mezbûra zimmetimde lâzımü’l-edâ ve vâcibü’l-kazâ deynimdir dedikde, gıbbe’t-tasdîki’ş-şer‘î ve’t-tahkīki’l-mer‘î vâki‘ hâli mezbûr Ebûbekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Mehmed ve Abdullah Efendi b. Veli ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene isneteyn ve mi’e ve elf. Şuhûdü’l-hâl: Sâbıkūn.