Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 517 Hüküm no: 541 Orijinal metin no: [133b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Abdi Çelebi’nin varisleri arasındaki miras davasında sulh olduğu Bâ-imzâ-i Hazret efendi. Mahmiye-i İstanbul’da Gurebâ Hüseyin Ağa mahâllesinde sâkin iken bundan akdem fevt olan Abdi Çelebi b. Hüseyin b. Rasûl nâm kimesnenin zî-rahm cihetinden hasran vârisesi olduğu lede’ş-şer‘ sâbit olan Havva bt. Hüseyin nâm hatun zâtı ba‘de’t-ta‘rîfi’ş-şer‘î mahmiye-i mezbûrede meclis-i şer‘de işbu râfi‘atü’l-vesîka Saliha bt. Ebubekir nâm hatun mahzarında ikrâr ve takrîr-i kelâm edip müteveffâ-yı mezbûrun ber-vech-i muharrer hasran vârisesi âhar diyârda iken mezbûre Saliha mûrisim müteveffâ-yı mezbûrun mukarrun-lehâ bi’n-neseb cihetinden hasran vârisesiyim deyü müteveffâ-yı mezbûr Hüseyin vefâtında mahâlle-i mezbûrda vâki‘ ma‘lûmü’l-hudûd mülk menzili ile ber-mûceb-i defter makbûzu olan nukūd ve eşyâ-i ma‘lûmesini mezbûre Saliha bundan akdem bana def‘ ü teslîm ben dahi ba‘de’l-ahz u kabz mûrisim müteveffâ-yı mezbûrun terekesinden mezbûre Saliha yedinde mecmû‘u yetmiş beş guruş kıymetli eşyâ-i ma‘lûmesini ahz u kabz ve ketm ü ihtifâ ve istihlâk etmişidi deyü eşyâ-i mezbûrenin kıymetleri olan meblağ-ı mezbûru bi-tarîkı’d-damân mezbûre Saliha Hatun’dan taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde cereyân etmişidi, el-hâletü hâzihi beynimizde muslihûn tavassut edip da‘vâ-i mezkûrumdan beni mezbûre hatun ile otuz guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz guruşu mezbûre Saliha Hatun yedinden tamâmen ahz u kabz edip mûrisim müteveffâ-yı mezbûrun kalîl u kesîr [ve] celîl ü hakīr nukūd ve menkūl ve akār bi’l-cümle terekesine müte‘allıka âmme-i da‘vâ ve kâffe-i mutâlebâtdan ben mezbûre Saliha Hatun’un zimmetini ibrâ-i âmm-ı kātı‘ü’n-nizâ‘la ibrâ‘ ve iskāt eyledim ol dahi mukaddemâ bana medfû‘u olan menzil-i mezkûr ve eşyâ-i mezbûreye ve bedel-i sulh deyü hâlâ bana medfû‘u olan meblağ-ı mezkûra müte‘allıka âmme-i da‘vâdan benim zimmetimi ibrâ’ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Mustafa Çelebi b. Ali, Mehmed Ağa el-mübâşir, Mehmed b. Hüseyin, Mehmed b. Ömer, Mehmed b. İbrahim, Hasan b. İbrahim.