Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 518 Hüküm no: 542 Orijinal metin no: [133b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzazistan’daki dükkânları içinde mevcut mallarını izinsiz olarak nakleden Bezzazistan kethüdası hakkındaki davanın sulhle sonuçlandığı Mahmiye-i İstanbul’da Bezzâzistân-ı cedîd sükkânından Cani v. İstemati ve Petro v. Yani nâm zimmîler mahmiye-i mezbûrede meclis-i şer‘de bezzâzistân-ı mezkûr kethüdâsı olan işbu râfiü’l-kitâb Ali Ağa b. İbrahim nâm kimesne mahzarında her biri ikrâr ve takrîr-i kelâm edip mezbûr Ali Ağa ber-vech-i muharrer bezzâzistân kethüdâsı olmağla bezzâzistân-ı mezkûrda dükkânımız içinde mevcûd malımız olan eşyâ-i ma‘lûmemiz gıyâbımızda bizden izinsiz dükkânımızdan ihrâc ve âhar dükkâna vaz‘ ve kabz etmişidi, el-hâletü hâzihi kethüdâ-i mezbûr Ali Ağa minvâl-i meşrûh üzere makbûzu olan eşyâ-i ma‘lûmemizi bi-a‘yânihâ bize def‘ ü teslîm biz dahi mezbûr Ali Ağa yedinden [133a] tamamen ahz u kabz eyledik, eşyâ-i ma‘lûmemizden mezbûr Ali Ağa yedinde ve kıbelinde bir nesnemiz bâkī kalmamağla husûs-ı mezkûre ve gayra müte‘allıka âmme-i da‘âvî ve kâffe-i mutâlebâtdan her birimiz mezbûr Ali Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik ba‘de’l-yevm mezbûr Ali Ağa ile husûs-ı mezkûre ve gayra müte‘allıka vechen mine’l-vücûh ve sebeben mine’l-esbâb kat‘â da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Mehmed Efendi b. Abdurrahman, el-Hâc Yahya b. Salih, el-Hâc Osman b. Mehmed, Mehmed b. Abdülkerim, Ömer Ağa b. Süleyman, es-Seyyid Ebubekir b. es-Seyyid Bedreddin, el-Hâc Ali b. Derviş İsmail Çelebi b. el-Hâc İbrahim, Ahmed b. Yusuf, es-Seyyid Mehmed Çelebi b. es-Seyyid Yahya, el-Hâc Musa b. Süleyman, el-Hâc Mustafa b. el-Hâc İvaz, Mahmud Beşe b. ( )