Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 518 Hüküm no: 543 Orijinal metin no: [134a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusçuklu Nikola’nın, ortağı olan Estati’deki alacağının şahitler huzurunda tespiti Fi’l-asl vilâyet-i Rumeli’nde Ruscuk kasabası ahâlîsinden olup hâlâ mahmiye-i İstanbul’da Laz Ahmed Hanı’nda sâkin işbu râfi‘ü’s-sifr Nikola v. Mihal nâm zimmî mahmiye-i mezbûrede meclis-i şer‘de mukaddemâ şirket-i inân ile şerîki olan Estati v. Dimitri nâm zimmî muvâcehesinde üzerine da‘vâ ve takrîr-i kelâm edip benim mezbûr Estati zimmetinde ber-vech-i muharrer mâl-ı şirket olmak üzere re‘s-i mâlım olan dokuz bin guruşdan mâ‘adâ cihet-i karz-ı şer‘îden bin yedi yüz on beş guruş hakkım olup hakk-ı mezbûru Estati bundan akdem benim için şerîkim Nikola’ya mâl-ı şirketden re‘s-i mâlı olan dokuz bin guruşdan mâ‘adâ cihet-i karz-ı şer‘îden bin yedi yüz on beş guruş zimmetimde vâcibü’l-edâ ve lâzimü’l-kazâ deynimdir deyü şuhûd mahzarında kirâren ve mirâren ikrâr ve işhâd dahi etmiş iken hâlâ meblağ-ı mezbûr bin yedi yüz on beş guruşu mezbûrdan talep eylediğimde edâ ve teslîmden imtinâ‘ eder suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda udûl-i ahrâr-ı ricâlden ve kasaba-i mezbûre ahâlîsinden ve zikri mürûr eden Laz Ahmed Ağa Hanı’nda sâkin Kostantin v. Dimitri ve merhûm Vezîriâzam Hüseyin Paşa Hanı’nda sâkin Kirkor v. Tomas nâm zimmîler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ işbu mezbûr Estati şerîki işbu müdde‘î-i mezbûr Nikola için şerîkim Nikola’ya mâl-ı şirket olmak üzere re‘s-i mâlı olan dokuz bin guruşdan mâ‘adâ cihet-i karz-ı şer‘îden bin yedi yüz on beş guruş zimmetimde vâcibü’l-edâ ve lâzimü’l-kazâ deynimdir deyü bundan akdem bizim muvâcehemizde kirâren ve mirâren ikrâr ve i‘tirâf edip bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Süleyman Efendi b. Şaban, Süleyman Ağa b. Ebubekir, Mehmed Çelebi b. ( ), Ali Çelebi b. Abdullah, Mahmud Bey b. Abdullah.