Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 519 Hüküm no: 544 Orijinal metin no: [134a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un Eflak asıllı cariyesi Vildan’ı azat etmesi Mahmiye-i İstanbul’da Firuz Ağa mahâllesinde sâkine Havva Hatun bt. Pîr Mehmed b. Hasan tarafından husûs-ı âti’l-beyana vekîl olduğu zât-ı mezbûreyi ma‘rifet-i şer‘iye ile ârifân Hüseyin Çelebi b. Bayram ve Mustafa b. Mehmed şehâdetleriyle şer‘an sâbit olan el-Hâc Yusuf b. Abdullah mahmiye-i mezbûrede meclis-i şer‘de müvekkilesi mezbûre Havva Hatun’un câriye-i memlûkesi râfi‘atü hâzihi’l-vesîka orta boylu açık kaşlı elâ gözlü Eflakiyyetü’l-asl Müslimetü’l-mille Vildan b. Abdullah mahzarında bi’l-vekâle ikrâr [134b] takrîr-i kelâm edip müvekkilem mezbûre Havva Hatun câriye-i memlûkesi işbu mevsûfe-i mezbûre Vildanı hasbeten lillâhi’l-azîm malından tahrîr ve i‘tâk ve zümre-i harâir-i asliyâta idrâc ve ilhâk eyledi, ba‘de’l-yevm mevsûfe-i merkūme Vildan sâir harâir-i asliyât gibi hürre olup üzerinde müvekkilem mezbûre Havva Hatun’un şer‘an sâbit olan hakk-ı velâdan gayri hakkı ve alâka ve medhali kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: İvaz Beşe b. Mehmed, el-Hâc Abdülbaki b. Abdullah, İsmail Çelebi b. Abdullah, Derzi Mehmed Beşe b. Abdürrahim, Ali Efendi b. Süleyman, İsmail Efendi el-kādı, Ömer Efendi el-kâtib, Veli Efendi el-kâtib, Mehmed Efendi el-kādı.