Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 520 Hüküm no: 546 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri İbrahim Ağa’nın habs ve parasının gasp edildiği iddiasını ispatlayamadığı Bağdad ahâlîsinden İbrahim Ağa b. Ali mahmiye-i İstanbul’da meclis-i şer‘de bin yüz on üç senesinde Bağdat muhâfazasına memûr olan Dergâh-ı âlî -dâme mahfûfen bi’l-meâlî- yeniçerilerinin on yedinci cemâ‘atine mahsûs odanın sâbıkā odabaşısı olan Mehmed Beşe b. İbrahim ve vekîlü’l-harc olan diğer Mehmed Beşe b. Abdullah mahzarlarında üzerlerine da‘vâ ve takrîr-i kelâm edip sene-i merkūmede oda-i mezbûre neferâtı Bağdad’da İmam Ali muhâfazasına ta‘yîn olundukların İmam Ali kasabasında mütevellî tarafından subaşı bulunmakla işbu mezbûrân Mehmed Beşe ve diğer Mehmed Beşe oda-i mezbûre neferâtına ta‘yîn olunan zahîreden mâ‘adâ beni ahz u habsedip bi-gayrı hakkın malımdan üç yüz yetmiş guruşumu ahz u kabz etmeleriyle hâlâ meblağ-ı mezbûr üç yüz yetmiş guruşu mezbûrân Mehmed Beşe ve diğer Mehmed Beşe’den taleb eylediğimde bana redd ü teslîmden imtina‘ [eder] suâl olunup alıverilmek matlûbumdur dedikde gıbbe’s-suâl ve akībe’l-inkâr müdde‘î-i mezbûr İbrahim Ağa’dan müdde‘âsına beyyine taleb olundukda ikāmet-i beyyineden izhâr-ı acz ile istihlâf etmeğin fi’l-vâki‘ oda-i mezkûr neferâtına ta‘yîn olunan zahîreden mâ‘adâ müdde‘î-i mezbûr İbrahim Ağa’nın malından ber-vech-i muharrer bi-gayrı hakkın üç yüz yetmiş guruşunu ahz u kabz etmediklerine mezbûrân Mehmed Beşe ve diğer Mehmed Beşe’ye yemîn [teklîf] olundukda onlar dahi hasbe’l-mesûl her biri yemîn billâh-i te‘âlâ etmeğin mûcibince müdde‘î-i mezbûr İbrahim Ağa bilâ-beyyine bî-vech-i mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-âşir min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Mustafa Çelebi b. İbrahim, İsmail Çelebi b. Osman, Ali Efendi b. Ahmed, el-Hâc Mehmed Efendi b. Ahmed, İsmail Efendi el-kādı, Ömer Efendi el-kādı, Veliyüddin Efendi el-kādı, Mehmed Efendi el-kâtib, Mustafa Efendi el-kâtib, Aydın Mehmed Efendi el-kâtib, el-Yusuf b. Osman.