Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 521 Hüküm no: 547 Orijinal metin no: [135b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panaki v. Panayot’un eşinin, kocasının terekesinden haksız olarak para alıp harcayan Yorgi’ye açtığı davada sulh olduğu Mahmiye-i İstanbul’da Fener kapısı hâricinde sâkine Anastaş bt. Vasil v. Yuvan nâm Nasrâniye tarafından husûs-ı âti’l-beyana vekîl olup zât-ı mezbûreyi ma‘rifet-i şer‘ ile ârifân Dimitri v. İstemat ve Yanaki v. Tanaş nâm zimmîler şehâdetleri ile hasm-ı câhid-i câ’i’z-zikr muvâcehesinde şer‘an vekâleti sâbite ve sübût-ı vekâletine hükm-i şer‘î lâhık olan İstefani v. Mikifor nâm zimmî mahmiye-i mezbûrede meclis-i şer‘de kuyumcu tâifesinden işbu râfi‘ü’s-sifr Yorgi v. Safyanoz nâm zimmî muvâcehesinde üzerine da‘vâ ve takrîr-i kelâm edip müvekkilem mezbûrenin merkūm Yorgi zimmetinde cihet-i deyn-i şer‘îden sekiz yüz elli Efrencî altın hakkı olup meblağ-ı mezbûrun dört yüz yirmi beş altınını bundan akdem mezbûr Yorgi müvekkilem mezbûreye edâ ve teslîm ol dahi yedinden ahz u kabz edip dört yüz yirmi beş Efrencî altını bâkī kalmağla hâlâ meblağ-ı bâkī-i mezbûru bi’l-vekâle mezbûr Yorgi’den taleb ederim su’âl olunsun dedikde, gıbbe’s-suâl mezbûr Yorgi cevâbında müvekkile-i mezbûre Anastaş’a kabzını mu‘terif oldukları meblağ-ı mezbûr dört yüz yirmi beş altından mâ‘adâsı olan meblağ-ı mezbûr dört yüz yirmi beş Efrencî altını işbu yedimde olan bir kıt‘a ibrâ hücceti nâtıka olduğu üzere yüz on beş senesi Saferi’l-hayrın dokuzuncu günü mahrûse-i Edirne’de bâb nâibi olan Kemaleddin Efendi b. Mehmed b. Ahmed huzûrunda husûs-ı mezbûra vekîl-i şer‘îsi olan Hürmez v. Dimitraşki v. Nikola nâm zimmî benden ba‘de’d-da‘vâ vesâtet-i muslihîn ile müvekkile-i mezbûre Anastaş’a da‘vâ-i mezkûresinden benimle elli guruş kıymetli bir sîm haydârî raht üzerine sulh oldukda ben dahi sulh-ı mezbûru kabûl ve bedel-i sulh olan mârrü’z-zikr sîm rahtı vekîl-i mezbûr yediyle benden ahz u kabz edip husûs-ı mezbûra müte‘allıka âmme-i da‘vâ ve kâffe-i mutâlebâtdan zimmetimi ibrâ-i âmm-ı kātı‘ü’n-nizâ‘la ibrâ ve iskāt eyleyip bu vech üzere meblağ-ı mezbûr mutâlebesinden zimmetim berî olmuşdur deyü da‘vâyı def‘ ve târîh-i mezkûr ile müverreha ve mûmâ-ileyh kıbelinden mümzâ ve hatemini hâvî ve mazmûnu min-külli’l-vücûh takrîr-i meşrûhuna mutâbıka bir kıt‘a ibrâ hücceti ibrâz ve istintâk olundukda vekîl-i müdde‘î-i mezbûr İstefani mazmûn-ı hüccet-i mezbûreyi bi’l-külliye inkâr edicek mezbûr Kuyumcu Yorgi’den takrîr-i meşrûhuna mutâbıka beyyine taleb olundukda udûl-i ahrâr ricâl-i Müslimînden ve hüccet-i mezkûrenin zeylinde mastûrü’l-ism olup medîne-i hazret-i Ebâ Eyyûbe’l-ensârî’de Servi mahâllinde sâkin İsmail Çelebi b. Mustafa ve el-Hâc Hüseyin b. Ömer nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müvekkile-i mezbûre Anastaş bt. Vasil v. Yuvan nâm Nasrâniye zikri mürûr eden bin yüz on beş sene[si] Saferi’l-hayr’ın dokuzuncu günü mahmiye-i mahrûse-i mezbûrede nâibü’ş-şer olan mezbûr Kemaleddin Efendi b. Mehmed b. Ahmed huzûrunda meblağ-ı bâkī-i mezbûru husûs-ı mezkûra vekîl-i şer‘îsi olan mezbûr Hürmüz v. Dimitraşki v. Nikola ile işbu merkūm kuyumcu Yorgi’den ba‘de’d-da‘vâ vesâtet-i muslihîn ile da‘vâ-i mezkûresinden elli guruş kıymetli bir sîm haydârî raht üzerine bizim huzûrumuzda sulh oldukda ol dahi sulh-ı mezbûru kabûl ve bedel-i sulh olan mârrü’z-zikr rahtı vekîl-i mezbûr Hürmüz yediyle yine bizim muvâcehemizde ba‘de’l-ahz ve’l-kabz husûs-ı mezkûra müte‘allıka âmme-i da‘vâ ve kâffe-i mutâlebâtdan müvekkile-i mezbûre Anastaş’a merkūm Yorgi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledikden sonra hâkim-i mûmâ-ileyh kıbelinden imzâ ve hatemini hâvî işbu bir kıt‘a ibrâ hücceti mezbûr Kuyumcu Yorgi yedine i‘tâ olunmuşdur. Mazmûn-ı hüccet-i mezkûreye biz bu vech üzere şâhidleriz, şehâdet dahi ederiz, deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müvekkile-i mezbûre ber-vech-i muharrer bî-vech mu‘ârazadan men‘ olunmak üzere vekîl-i müdde‘î-i mezbûra tenbîh birle mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Recebi’l-ferd li-sene sitte aşere ve mi’e ve elf. Şuhûdü’l-hâl: Halil Çelebi b. Mehmed, Mustafa Çelebi kıncı, Abdullah Çelebi kafesdar?, Mustafa Çelebi kalıbdar?, İsmail Efendi el-kādı.