Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 523 Hüküm no: 548 Orijinal metin no: [136a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın Ömer Efendi’ye hibe ettiği arsanın satıldığı Husûs-ı âti’l-beyanın mahâllinde tahrîri iltimâs olunmağın bu fakīr Darü’l-hilâfeti’l-aliyye Kostantıniyetü’l-mahmiye’de Gül Câmi‘i mahâllesinde fahrü’l-kuzât Cafer-i Sadık Efendi’nin menziline varıp zeyl-i sahîfede mastûrü’l-esâmi Müslimîn huzûrlarında akd-i meclis-i şer‘-i âlî olundukda mahmiye-i mezbûrede Mütfî Ali Çelebi mahâllesinde sâkin Hasan Ağa b. Mehmed meclis-i ma‘kūd-ı mezbûrede işbu sâhibü’l-vesîka Ömer Efendi b. Osman mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik ve münharit olup mârrü’z-zikr Müftî Ali Çelebi mahâllesinde vâki‘ bir tarafdan el-Hâc İbrahim mülkü ve ba‘zan Fâtıma Hatun mülkü ve bir tarafdan el-Hâc Yusuf mülkü ve ba‘zan Abdülbaki menzili ve bir tarafdan el-Hâc Abdülfettah veresesi menzili ve bir tarafdan tarîk-i âm ile mahdûd hâriciyede fevkānî üç bâb oda ve sofa ve tahtânî bir oda ve bi’r-i mâ’ı ve kenîf ve havluyu ve dâhiliyesinde fevkānî iki oda ve sofa ve tahtânî üç oda ve bir fevkānî hamam ve bir matbâh ve bi’r-i mâ ve eşcâr-ı müsmire ve gayri müsmireli bahçeyi muhtevî mülk menzilimin mezbûrân el-Hâc İbrahim ve Fâtıma Hatun taraflarından arzen yüz zirâ‘ ve tûlen otuz beş zirâ‘ arsasını mezbûr Ömer Efendi’ye fâriğān ani’ş-şevâgil hibe-i sahîha-i şer‘iye ile hibe ve temlîk ve teslîm ol dahi meclis-i hibede ittihâb ve temellük ve kabz ve kabûl edip arsa-i mezbûre mülk-i mevhûbu oldukdan sonra mâ‘adâ menzil-i mahdûd-ı mezbûru cümle tevâbi‘ ve levâhıkıyla tarafından îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mezkûr Ömer Efendi’ye bin beş yüz guruşa bey‘ ü teslîm ol dahi ber-vech-i muharrer iştirâ ve kabz eyleyip semen-i mezkûrun beş yüz guruşunu yedinden ahz u kabz eylediğimden sonra mâ‘adâsı olan bin guruşu târîh-i kitâbdan yüz seksen gün tamâmına değin tecîl ve te’hîr ol dahi kabûl eyledi fîmâ-ba‘d menzil-i mahdûd-ı mezkûr merkūm Ömer Efendi’nin mülk-i müşterâsıdır keyfe mâ yeşâ’ ve yehtâr mutasarrıf olsun dedikde gıbbe’t-tasdîk mâ-hüve’l-vâki‘ bi’t-taleb ketb olundu. Fî-gurreti Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Fahrü’l-kuzât Cafer-i Sadık Efendi b. Ali, Mehmed Efendi b. Salih el-imâm, es-Seyyid Ahmed Efendi b. es-Seyyid Hüseyin, Hasan Halîfe b. Ali, el-Hâc Durmuş b. Ebubekir, el-Hâc Mahmud b. Hasan, Ahmed Efendi b. el-Hâc Ali.