Bab Mahkemesi 54 Numaralı Sicil (H. 1102 / M. 1691) cilt: 20, sayfa: 384 Hüküm no: 468 Orijinal metin no: [82a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Abdullah’ın Mehmed Bey b. Ali’de alacağı olduğu Husûs-ı âti’z-zikrin mahallinde ketb ü tahrîri için savb-ı şer‘den matlûben irsâl olunan Ebûbekir Efendi haffâf tâifesinden el-Hâc Mehmed b. Abdullah’ın mahmiye-i İstanbul’da Sultanhamamı kurbunda Çakır Ağa mahallesinde sâkin olduğu menziline varıp, zeyl-i kitâbda muharrerü’l-esâmi müslimîn huzûrlarında akd-i meclis-i şer‘-i hatîr eyledikde, mezbûr el-Hâc Mehmed meclis-i ma‘kūd-ı mezbûrda Hoca Üveys mahallesi sükkânından Mehmed Bey b. Ali nâm kimesne mahzarında takrîr-i kelâm ve ta‘bîr ani’l-merâm edip, bundan akdem mezbûr Mehmed Bey’e dört yüz on altı esedî guruş idâne ve teslîm, ol dahi istidâne ve kabz eyledikden sonra meblağ-ı mezbûrun yüz altmış altı guruşunu yedinden ahz u kabz edip, iki yüz guruş bâkī kalmışdır. Hâlâ suâl olunup takrîri tahrîr olunmak matlûbumdur dedikde, gıbbe’s-suâl mezbûr Mehmed Bey cevâbında, fi’l-hakīka kaziyye vech-i muharrer üzre olup, mukaddemâ mezbûr el-Hâc Mehmed’den dört yüz on altı guruşunu istidâne ve kabz edip, meblağ-ı mezbûrun yüz altmış altı guruşunu kendiye edâ ve teslîm edip, mâ‘adâsı olan iki yüz elli guruş el-ân zimmetimde lâzımü’l-edâ deynimdir deyu ikrâr ve i‘tirâf etmeğin, vâki‘ hâli mezbûr Ebûbekir Efendi mahallinde ketb ü tahrîr edip, ba‘dehû ma‘an ba‘s olunan Mustafa Beşe b. Ahmed [Mehmed] ve Abdullah Efendi b. Veli ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb [ketb] olundu. Fi’l-yevmi’r-râbi‘ aşer min Cumâdelâhire sene 1102. Şuhûdü’l-hâl: Sâbıkūn.