Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 525 Hüküm no: 550 Orijinal metin no: [136b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemâl b. Mehmed’in nukud vakfından para istikraz eden Tanaş, Zümrüd ve Saltana adlı gayrimüslimlerin borçlarını ödedikleri Mahmiye-i İstanbul’da merhûm Kemâl [b.] el-Hâc Mehmed’in eczâ-i şerîf için vakfeylediği nukūdun bi’l-fi‘il mütevellîsi olan Hüseyin Efendi b. Mustafa mahmiye-i mezbûrede meclis-i şer‘de nefsinden asil ve zevcesi Zümrüd bt. Todori nâm Nasrâniyenin husûs-ı âti’l-beyana vekîl-i şer‘îsi olan Bakkāl Tanaş v. ( ) nâm zimmî ile müvekkile-i merkūmenin vâlidesi Saltana bt. Todori nâm Nasrâniye muvâcehesinde bi’t-tevliye ikrâr ve takrîr-i kelâm edip bundan akdem mütevellîsi olduğum mâl-ı vakf-ı mezbûrdan işbu merkūme Saltana ile kızı müvekkile-i merkūme Zümrüd’e yüz kıt‘a esedî guruş ikrâz ve teslîm onlar dahi ber-vech-i iştirâk iktirâz ve kabz ve istihlâk etdiklerinden sonra meblağ-ı mezbûre işbu merkūm Bakkāl Tanaş emr u kabûlü hâviye kefâlet-i sahîha-i şer‘iyye ile kefil olmuş idi, el-Hâletü hâzihi mezbûrdan Bakkāl Tanaş ve zevcesi merkūme Zümrüd ve Saltana meblağ-ı mezbûr yüz guruşu vakıf için tamâmen bana def‘ ü teslîm ben dahi yedlerinden tamâmen ahz u kabz eyledim min-ba‘d mâl-ı vakf-ı mezbûrdan asiletân-ı mezbûretân Zümrüd ve Saltana ile kefil-i mezbûr Bakkāl Tanaş zimmetlerinde bir akçe ve bir habbe bâkī kalmadı dedikde gıbbe’t-tasdîkı’l-mu‘teber mütevellî-i mezbûr Hüseyin Efendi’in oğlu Mustafa Efendi dahi mezbûrân Tanaş ve Saltana muvâcehelerinde ikrâr ve takrîr-i kelâm edip ben dahi meblağ-ı mevkūf-ı mezbûr yüz guruşu babam mütevellî-i mezbûr Hüseyin Efendi tarafından mezbûrûn Tanaş ve Zümrüd ve Saltana’dan taleb üzere idim ber-vech-i muharrer taleb eylediğim meblağ-ı mezbûr yüz guruş mâl-ı vakf-ı mezbûrdan hâlâ babam mütevellî-i mezbûra edâ eyledikleri yüz guruş olup benim mezbûrûn Tanaş ve Zümrüd ve Saltana zimmetlerinde bir akçe ve bir habbe hakkım ve mezbûrûn ile vechen mine’l-vücûh aslâ da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Ali Efendi b. Ahmed, el-Hâc Mehmed bin Ahmed, İbrahim Çavuş el-mübâşir, Mehmed Efendi b. İbrahim, el-Hâc Yusuf b. Osman, Abdullah Efendi b. Mehmed el-müezzin.