Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 526 Hüküm no: 551 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbaki Ağa’nın, kölesi Macar asıllı Hasan İvaz’ı azat etmesi Mahmiye-i İstanbul’da Cezerî Kasım Paşa mahâllesi sükkânından Abdülbaki Ağa b. Ali tarafından oğlu ve husûs-i âti’l-beyana vekîl olduğu Osman b. Abdullah ve Ahmed b. Abdullah nâm kimesneler şehâdetleriyle sâbit olan Hasan Ağa nâm kimesne mahmiye-i mezbûrede meclis-i şer‘-i hatîrde bi’l-vekâle ikrâr ve takrîr-i kelâm edip müvekkilim mezbûr Abdülbaki Ağa kendüye rıkk-ı sâbıkını mu‘terif olan işbu uzun boylu kumral sakallı elâ güzlü Macariyyü’l-asl Müslimü’l-mille bâ‘isü’l-vesîka Hasan İvaz nâm abd-i memlûkünü hasbeten lillâhi te‘âlâ ve tâliben li-merzâti rabbihi’l-a‘lâ malından tahrîr ve i‘tâk ve zümre-i ahrâr-ı asliyyîn silkine idrâc ve ilhâk eyledi fîmâ-ba‘d mevsûf-ı mezbûr Hasan İvaz sâir ahrâr-ı asliyyîn gibi hür olup müvekkilim mezbûrun mezbûr Hasan İvaz üzerinde velâ-i şer‘îden gayri alâka ve medhali kalmadı dedikde mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Şa‘bâni’l-mu‘azzam sene 1116. Şuhûdü’l-hâl: Ömer Ağa b. Osman, Hasan b. Abdullah, el-Hâc Abdülbaki b. Ali, Yusuf b. Mahmud, Mustafa b. Abdullah, el-Hâc Yusuf b. Osman.