Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 526 Hüküm no: 552 Orijinal metin no: [137a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in, kendisine annesi Ayşe Hatun’dan miras kalan ev hissesini babasına sattığı Mahmiye-i İstanbul’da Şeyh Resmi mahâllesinde sâkine iken bundan akdem fevt olan Âişe Hatun bt. Hasan b. Abdullah’ın verâseti zevci bâ‘isü’l-kitâb el-Hâc Mehmed b. Cafer ile sadriye kebîre kızları Emine ve Saliha ve Afîfe ve Ümmühani’ye münhasıra olup kable’l-kısme mezbûre Ümmühani dahi fevt olup verâseti ancak babası mezbûr el-Hâc Mehmed’e münhasıra ve tashîh-i meseleleri bi-hükmi’l-münâsahati’ş-şer‘iyye on altı sehmden i‘tibâr olunup sihâm-ı mezbûreden yedi sehmi mezbûr el-Hâc Mehmed’e ve üçer sehmi mezbûrât Emine ve Saliha ve Afîfe’den her birine isâbeti tahakkukdan sonra zâtı ta‘rîf-i şer‘î ile mu‘arrefe mezbûre Emine mahmiye-i mezbûrede meclis-i şer‘-i hatîrde babası mezbûr el-Hâc Mehmed mahzarında ikrâr ve takrîr-i kelâm edip arsasının mârrü’z-zikr Şeyh Resmi mescid-i şerîfi imamına senede üç yüz altmış akçe mukāta‘a-i kadîmesi olup mahâlle-i mezbûrede vâki‘ bir tarafı Mesud Efendi mülkü ve bir tarafı Ali Efendi mülkü ve bir tarafı mescid-i mezbûr harîmi ve bir tarafı tarîk-i âm ile mahdûd hâriciye fevkānî iki bâb oda ve bir sofa ve dehliz ve bir mâbeyn odası ve kenîf ve bi‘r-i mâ ve bir harâb şîrugan kârhânesi ve ahır ve havluyu ve dâhiliye fevkāni iki bâb oda ve bir köşk ve bir sofa ve dehliz ve kenîf ve müşterek bi‘r-i mâ ve bahçe ve bir mikdâr havluyu müştemil binâsı mülk menzilin nısfı babam mezbûr el-Hâc Mehmed’in nısf-ı âharı vâlidem müteveffât-ı mezbûre Âişe Hatun’un ile’l-vefât mülkü olup ba‘de-vefâtihâ tashîh-i mezbûr üzere bana ve sâir verese-i mezkûresine isâbet ve intikāl eylemekle hâlâ ben menzil-i mahdûd-ı mezbûrun nısfından tashîh-i mezbûr üzere üç sehim hissemi yüz elli guruşa babam mezbûr el-Hâc Mehmed tarafından îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm ol dahi bu vech-i meşrûh iştirâ ve tesellüm ve kabûl edip semeni olan meblağ-ı mezbûr yüz elli guruşu babam mezbûr el-Hâc Mehmed yedinden tamâmen ahz u kabz eyledim, fîmâ-ba‘d menzil-i mezbûrun nısfından tashîh-i mezbûr üzere benim hisseme isâbet eden üç sehm-i şâyi‘am babam mezbûr el-Hâc Mehmed’in mülk-i müşterâsı ve hakk-ı sırfı olmuşdur, keyfe mâ yeşâ‘ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Şa‘bâni’l-mu‘azzam li-sene sitte aşere ve mi’e ve elf. Şuhûdü’l-hâl: Ahmed Ağa b. Halil, Mehmed b. Ahmed Ağa, Mustafa Çelebi b. el-Hâc Halil, el-Hâc Hasan b. Mustafa, Mustafa Efendi b. Mehmed, İbrahim Çelebi b. Veli, Veli Efendi reis, Süleyman Efendi b. Şaban.