Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 527 Hüküm no: 553 Orijinal metin no: [137a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Ahmed oğlu İsmail’in babasının cariyesi olduğunu iddia ettiği Afife’nin önceden azat edilmiş olduğu Mahmiye-i İstanbul’da Kâtip mahâllesinde sâkin iken bundan akdem vefât eden Çolak Ahmed Ağa b. Ali b. Mustafa’nın verâseti zevce-i menkûha-i metrûkesi Rukıye Hanım bt. İbrahim Paşa ile sulbî kebîr oğlu İsmail ve sulbiye kebîre kızları Âişe ve Havva’ya mühnasıra olduğu şer‘an zâhir ve müte‘ayyin oldukdan sonra mezbûr İsmail Ağa mahmiye-i mezbûrda meclis-i şer‘i hatîrde müteveffâ-yı mezbûr Ahmed Ağa’ya rıkk-ı sâbıkını mu‘terife olan orta boylu kara gözlü kara kaşlı Rusiyyetü’l-asl Müslimetü’l-mille bâ‘isetü hâzihi’l-vesîka Arife bt. Abdullah muvâcehesinde üzerine da‘vâ ve takrîr-i kelâm edip mevsûfe-i mezbûre Arife babam müteveffâ-yı mezbûrun câriye-i memlûkesi olup kable’l-i‘tâk babam mezbûr Çolak Ahmed Ağa vefât edip mevsûfe-i mezbûre bi’l-ırsi’ş-şer‘î bana ve sâir veresesine isâbet ve intikāl etmiş iken hâlâ mevsûfe-i mezbûre Arife bana ve sâir vereseye rıkka inkıyâddan imtinâ‘ eder suâl olunsun dedikde gıbbe’s-suâl mevsûfe-i mezbûre Arife cevâbında fi’l-hakīka müteveffâ-yı mezbûrun câriye-i memlûkesi olduğunu ikrâr lâkin müteveffâ-yı mezbûr Ahmed Ağa hayâtında târîh-i kitâbdan on beş sene mukaddem mahzar-ı Müslimînde beni tahrîr ve i‘tâk ve sâir harâir-i asliyât silkine idrâc ve ilhâk etmekle ben sâir harâir-i asliyât gibi hür olmuşumdur deyü def‘le mukābele edicek gıbbe’l-istintâk ve’l-inkâr [137b] mevsûfe-i mezbûre Arife’den def‘-i mezkûruna beyyine taleb olundukda udûl-i Müslimînden ve mahmiye-i mezbûrda Hoşkadem mahâllesi ahâlîsinden el-Hâc Mustafa b. Ömer ve Hocapaşa mahâllesi ahâlîsinden Ali Bey b. Hasan nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka mahmiye-i mezbûrede zikr olunan Kâtip Şemseddin mahâllesinde sâkin iken bundan akdem vefât eden Çolak Ahmed Ağa b. Ali b. Mustafa hayâtında târîh-i kitâbdan on beş sene mukaddem câriye-i memlûkesi işbu mevsûfe-i mezbûre Arife’yi bizim huzûrumuzda malından i‘tâk ve zümre-i harâir-i asliyât silkine idrâc ve ilhâk eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince mevsûfe-i mezbûre Arife’nin ıtkına ba‘de’l-hükm mezbûr İsmail Ağa bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min-Şa‘bâni’l-mu‘azzam li-sene aşere ve mi’e ve elf. Şuhûdü’l-hâl: Abdullah Efendi b. Ali el-imâm, es-Seyyid Mustafa b. es-Seyyid Ahmed, Mehmed Çelebi b. Receb, es-Seyyid Hasan b. es-Seyyid Abdülkadir Ağa Beşe?